Fimm­tán ára skoraði tvö þegar KR fór í úr­slit

Alexander varð í fyrra yngstur til að byrja leik og skora í efstu deild karla, aðeins fimmtán ára og 33 daga gamall. Hann skoraði einnig þrennu í bikarsigri og í ágúst var greint frá því að hann myndi ganga í raðir Nordsjælland í Danmörku í byrjun júlí á þessu ári.

Alexander, sem verður sextán ára 7. apríl næstkomandi, skoraði tvö mörk fyrir KR í leiknum á Samsung-vellinum í dag. Amin Cosic, sem kom til KR frá Njarðvík um mitt síðasta tímabil, skoraði einnig tvö mörk.

Arnór Ingvi Traustason fékk sitt annað gula spjald og þar með rautt á 78. mínútu þegar hann braut á Örvari Eggertssyni innan vítateigs. Örvar tók vítaspyrnuna sjálfur en Arnar Freyr Ólafsson varði frá honum.

Í úrslitaleik Lengjubikarsins 21. mars mætir KR annað hvort Þór eða Fylki. Liðin mætast á Akureyri á þriðjudaginn kemur.