Sögðu upp blaða­mönnum Grapevine og reksturinn í járnum

„Þetta var ekki ákvörðun sem var tekin af mikilli ánægju heldur var reynt að fresta henni í lengstu lög. Reksturinn hefur verið í járnum síðustu árin og við sáum ekki fram á að við gætum leyft okkur þau forréttindi að vera með vel mannaða ritstjórn í nánustu framtíð,“ segir Jón Trausti Sigurðsson, útgefandi Reykjavík Grapevine.

Starfsmennirnir sem voru reknir voru tveir blaðamenn í föstu starfi og hlutastarfsmaður sem hélt utan um menningardagskrá blaðsins. 

Eftir uppsagnirnar verða fjórir eftir á skrifstofu blaðsins og aðeins tveir sem vinna við skriftir; ritstjórinn Bart Cameron og Jón Trausti sjálfur. Þeir ætla að skrifa meira og leitað verður til lausapenna í auknum mæli til þess að fylla blaðið.

Útgáfa Reykjavík Grapevine verður óbreytt og engar aðrar meiriháttar breytingar eru í farvatninu, að sögn Jóns Trausta. Blaðið sé hvorki á leið í rekstrarstöðvun né í gjaldþrot.

„Við ætlum að halda áfram að gefa út, vera til og sinna því sem við höfum gert, að fjalla um menningu, ferðaþjónustu og pólitík,“ segir hann.

Prent- og launakostnaður aukist

Jón Trausti segir að sólin hafi ekki skinið á íslenska fjölmiðlaútgáfu síðustu árin. Uppsagnir hafa verið á öllum helstu einkafjölmiðlum landsins. 

„Þetta er bara partur af því umhverfi. Þetta er alveg ferlegt og þyngra en tárum taki en þetta er staðan,“ segir útgáfandinn,

Prentkostnaður hafi hátt í þrefaldast frá árinu 2019 og launakostnaður, stærsti kostnaðarliðurinn, hafi ekki lækkað heldur. Auglýsingasala hafi nokkurn veginn staðið í stað. Hún sé ekki glimrandi en ásættanleg.

Ekki hafi því verið forsendur til þess að reka blaðið áfram með óbreyttri mönnun við núverandi aðstæður.

Grapevine var í sömu stöðu eftir efnahagshrunið og segir Jón Trausti að þá hafi fjórar manneskjur rekið blaðið um tveggja ára skeið. Það sé ekki ánægjulegt að fara sömu leið aftur en að hún sé þó fær.

„Og vonast síðan til að umhverfið sem við erum í batni að einhverju leyti eða við getum fundið einhverja aðra leið til þess að afla tekna,“ segir hann.

Ríkisstyrkur aðeins dropi í hafið

Stjórnvöld hafa reynt að koma til móts við rekstrarvanda einkarekinna fjölmiðla síðustu ár með rekstrarstyrkjum. Fröken ehf., útgáfufélag Reykjavík Grapevine, fékk tæpar þrettán milljónir króna í slíkan styrk í fyrra. Til samanburðar voru meðalárslaun á Íslandi rétt rúmar níu milljónir króna árið 2024.

Styrkirnir eru tengdir við rekstrarkostnað fjölmiðla. Niðurskurðaraðgerðirnar hjá Grapevine þýða þannig að blaðið getur vænst lægri styrks þegar og ef stjórnvöld ákveða að útdeila slíkum styrkjum á þessu ári en í fyrra. Það ræður þó ekki úrslitum fyrir örlög blaðsins.

„Fjölmiðlastyrkurinn, eins ágætur og hann er fyrir bókhaldið, er dropi í hafið,“ segir Jón Trausti.

Fröken ehf. skilaði 2,9 milljóna króna hagnaði árið 2024 samkvæmt ársreikningi félagsins en eigið fé þess var neikvætt um tæpar þrettán milljónir króna. Laun og launatengd gjöld útgáfufélagsins námu 65,2 milljónum króna það ár en þau lækkuðu þá um tæpar tuttugu milljónir króna á milli ára.