Kvörtuðu yfir of miklum snjó á Vetrarólympíu­leikunum

Grein á vef kanadíska ólympíusambandsins hefur vakið athygli en í fyrirsögn segir að „snjóstormur hafi hindrað metnað“ kanadíska skíðafimiliðsins.

Keppt er í fjögurra manna riðlum í skíðaatinu og komast tveir áfram hverju sinni, þar til fjórir standa eftir í úrslitum. Reece Howden og Kevin Drury komust lengst Kanadabúa en féllu úr keppni í 16-manna úrslitum eftir að hafa endað neðstir í sínum riðlum.

Ættum ekki að keppa við þessar aðstæður

„Það er virkilega ömurlegt að ég sé búinn að æfa í fjögur ár og þetta sé það sem við fáum að keppa í,“ sagði Howden á vef kanadíska sambandsins, hundóánægður með snjókomuna. Hann var þó ekki með neina sérstaka lausn á því hvað gera hefði átt í staðinn en keppnin fór fram á næstsíðasta degi leikanna.

„Það má segja að þetta sé bara móðir náttúra, og jú, þetta er bara móðir náttúra. En mér finnst að við ættum ekki að vera að keppa við þessar aðstæður, bara punktur,“ sagði Howden.

Hinn 37 ára gamli Kevin Drury var álíka svekktur en hann var að taka þátt í sínum þriðju og síðustu Ólympíuleikum. Hann náði best fjórða sæti í PyeongChang 2018.

„Ef þeir vildu setja upp sýningu, sem þeir segjast alltaf vilja gera, þá er þetta ekki sýningin,“ sagði Drury. „Ég var í raun farinn að ná tökum á þessari braut og var virkilega spenntur. Ég náði ræsingunni, sennilega þeirri bestu sem ég hef náð allan þann tíma sem við höfum verið hér,“ sagði Drury.