„Þetta ætti að smella bara eins og flís við rass“

„Hann [Jeremy Pargo] er með mikla reynslu og ákveðin gæði sem við trúum að muni styrkja liðið. Við vitum hvað við erum að fá og það er aðallega það sem við vorum að leita í“ sagði Jóhann í samtali við Vísi.

Bandaríski leikstjórnandinn spilar sinn fyrsta leik á þessu tímabili fyrir Grindavík í kvöld. Hann leysir Khalil Shabazz af hólmi en Pargo kláraði einnig tímabilið með Grindavík í fyrra og ætti því að smella strax inn í liðið.

„Já, alveg klárlega. Hann kom hérna í síðustu viku og hefur með okkur í einhverja tíu daga. Hann veit nákvæmlega að hverju hann gengur og við líka, þannig að þetta ætti að smella bara eins og flís við rass.“

Topplið Grindavíkur hefur hins vegar orðið fyrir skakkaföllum. Arnór Tristan Helgason meiddist á hné í leik gegn Val á dögunum og verður frá keppni næstu vikurnar.

„Klárlega mikill missir. Við erum ekki með breiðan hóp og Arnór hefur líka bara staðið sig mjög vel í vetur, það er mikill missir að hann detti út en vonandi verður hann klár aftur sem fyrst“ sagði Jóhann en gat ekki sagt til um hvenær Arnór myndi snúa aftur. Vonandi yrði það fyrir úrslitakeppnina.

Jóhann Þór tók sér stutt leyfi frá störfum í janúar eftir að eiginkona hans, Sif Rós, greindist með MND-taugasjúkdóm. Aðstoðarþjálfarinn Helgi Magnússon stýrði liðinu í næstu leikjum en Jóhann sneri aftur á gólfið í síðustu umferð.

„Þetta er ákveðin biðstaða sem við hjónin erum í en ég tók ákvörðun um að snúa til baka og dreifa huganum. Þessi síðustu þrjú ár hafa kennt manni ýmislegt og þetta er bara enn eitt verkefnið sem við fáum í fangið á stuttum tíma. En við verðum bara að lifa með því og gera eins vel og hægt er úr þeim aðstæðum“ sagði Jóhann að lokum.

Leikur Keflavíkur og Grindavíkur hefst klukkan 19:30 í kvöld og verður í beinni útsendingu á Sýn Sport Ísland.