Tómas hetjan á dramatískan hátt í Edin­borgarslagnum

Það er mikill rígur á milli félaganna tveggja og ætla má að Tómas Bent sé nú með marki sínu í kvöld að marka sér varanlegan sess í hugum og hjörtum stuðningsmanna Hearts. 

Það virtist allt ætla stefna í markalaust jafntefli í leik liðanna í kvöld sem hefði reynst Hearts dýrkeypt í toppbaráttu skosku úrvalsdeildarinnar en þegar komið var fram á 88.mínútu skoraði Tómas Bent það sem átti eftir að reynast sigurmarki.

Skot hans rétt fyrir utan markteig Hibernian, eftir stoðsendingu frá Harry Milne, söng í netinu og tryggði Hearts dramatískan sigur sem sér til þess að liðið er nú með sex stiga forskot á toppi skosku úrvalsdeildarinnar.

Rangers vermir annað sætið og á leik til góða á Hearts og þá er Celtic ekki langt á eftir þessum liðum og á tvo leiki til góða á Hearts.