Al­freð stýrði Þjóð­verjum inn í undanúrslitin á EM

Alfreð Gíslason verður í undanúrslitum Evrópumótsins í handbolta ásamt íslenska landsliðinu en þetta varð ljóst eftir fjögurra marka sigur Þjóðverja á Frökkum, 38-34, í lokaumferð milliriðilsins í kvöld.

Þýska liðið er eins og er í efsta sæti riðilsins en það kemur ekki í ljós fyrr en í kvöld hvort Danir nái því af þeim. Danir geta valið sér mótherja.

Juri Knorr hefur ekki verið alltof áberandi í mótinu til þess en hann átti stórleik á besta tíma í kvöld og endaði með tíu mörk.

Þjóðverjar voru tveimur stigum á undan Frökkum fyrir leikinn en Frakkar hefðu komist upp fyrir þá í innbyrðis leikjum með sigri.

Alfreð var með sína menn vel stillta í leiknum og þýska liðið tók frumkvæðið í upphafi leiks. Liðið var 4-2 yfir og náði fjögurra marka forskoti um miðjan hálfleikinn.

Frakkar minnkuðu muninn í tvö mörk undir lok hans en Þjóðverjar skoruðu tvö síðustu mörk hálfleiksins og voru fjórum mörkum yfir í hálfleik, 19-15. Juri Knorr var með sex mörk úr sex skotum í fyrri hálfleiknum.

Þjóðverjar komust fimm mörkum yfir í upphafi seinni hálfleiks og Frakkar minnkuðu muninn í eitt mark um miðjan hálfleikinn. Þýska liðið var sterkara liðið á spennuþrungnum lokamínútum og tryggði sér sigurinn.

Þetta er annað Evrópumótið í röð þar sem þýska liðið kemst í undanúrslit en liðið endaði í fjórða sætinu fyrir tveimur árum. Liðið vann síðast verðlaun á Evrópumóti þegar Dagur Sigurðsson gerði Þjóðverja að Evrópumeisturum árið 2016.