Hafi af­hent Trump Friðar­verð­laun Nóbels

Machado fékk friðarverðlaunin í fyrra vegna baráttu sinnar fyrir lýðræði í Venesúela. Hún hefur stutt umdeilda handtöku Bandaríkjastjórnar á Nicolás Maduro, forseta Venesúela, og lýsti því fljótlega yfir eftir aðgerðirnar að stjórnarandstaðan væri tilbúin að taka við stjórnartaumum í landinu. Bandaríkjastjórn hefur sýnt því boði lítinn áhuga fram að þessu.

Machado fundaði með Trump í Hvíta húsinu og greindi hópi blaðamanna í kjölfarið frá því að hún hafi afhent forsetanum verðlaunin en veitti takmarkaðar upplýsingar. Hvíta húsið hefur ekki gefið út hvort Trump hafi þegið Nóbelsorðuna.

Var í felum

Á fundinum er Machado sögð hafa rætt við Trump um framtíð Venesúela en hann hefur áður lýst því yfir að hann telji hana ekki vera trúverðugt leiðtogefni. Henni var bannað að bjóða sig fram til forseta gegn Maduro í síðustu kosningum í Venesúela. 

AP-fréttaveitan greinir frá heimsókn Machado sem er sögð nokkuð áhættusöm í ljósi þess að hún hefur verið í felum frá því að hún yfirgaf Venesúela í fyrra. Hún hafði áður verið í haldi í stuttan tíma í höfuðborginni Karakas.

„Við getum treyst á Trump forseta,“ sagði hún við stuðningsfólk fyrir utan Hvíta húsið eftir fundinn en skýrði það ekki nánar. Brugðust nokkrir við með því að hrópa: „Takk fyrir Trump!“

Trump hefur ítrekað lýst yfir efasemdum um Machado og þá treysta ekki allir yfirlýsingum hans um að til standi að byggja upp lýðræðislegt stjórnkerfi í Venesúela. Hann hefur gefið til kynna að hann sé tilbúinn að vinna með Delcy Rodríguez, starfandi forseta, sem var jafnframt sú næsta í valdaröðinni á eftir Maduro og náin samstarfskona hans.

Bandaríkjastjórn hefur lagt mikla áherslu á að bandarísk og evrópsk olíufyrirtæki hefji olíuvinnslu í Venesúela. Þá hyggjast Bandaríkin taka yfir alþjóðlega sölu á olíu þaðan sem féll áður undir efnahagslegar refsiaðgerðir.