Liðsfélagar Guð­bjargar ekki fæddir þegar hún spilaði fyrsta leikinn

Bónus Körfuboltakvöld fjallaði um þessi tímamót Guðbjargar en annar af sérfræðingum þáttarins var einmitt eldri systir hennar, Helena Sverrisdóttir.

„Ég vissi þetta ekki fyrr en áðan. Sendi þá á hana: Þú varst ekkert að láta vita. Ég vissi þetta ekki heldur svaraði hún,“ sagði Helena um samskipti systranna tveggja.

Það er erfitt að ná þessu

„Þetta er frábært og ég man einmitt eftir tímabilinu í fyrra þegar maður var að velta fyrir sér: Ætlar hún að fara að hætta eða hvað ætlar hún að gera? Hún var svo nálægt fjögur hundruð og þú hættir ekki í 390 og eitthvað. Þetta var geggjað mark að ná og það er erfitt að ná þessu,“ sagði Helena.

Guðbjörg lék fyrsta leikinn sinn 11. febrúar 2007 þegar hún var 14 ára og 4 mánaða en síðan eru liðin átján ár, tíu mánuðir og sjö dagar. Hún er að spila á sínu tuttugasta tímabili í efstu deild.

Fjórir liðsfélagar hennar í fjögur hundruðasta leiknum voru ekki fæddar þegar hún spilaði fyrsta leikinn eða þær Fatima Rós Joof, Ísey Ísis Guttormsdóttir Frost, Hanna Gróa Halldórsdóttir og Berta María Þorkelsdóttir.

„Þegar maður lítur yfir flottan feril. Hún lenti í hásinarslitum sem eru mjög erfið meiðsli. Að hún sé að spila enn þá eftir það, þótt hún sé að glíma við sitt, er geggjað,“ sagði Helena.

Orðin drottningin í Val

„Hún er orðin drottningin í Val, er búin að vera þarna í mörg ár og er andlit kvennaliðs félagsins,“ sagði Ólöf Helga Pálsdóttir.

„Það er bara ótrúlega skemmtilegt því þegar maður hugsar um Val í dag þá hugsar maður um Guðbjörgu. Þegar ég var að spila þá var hún í Haukum og var Haukakona í gegn. Nú er Valshjartað búið að skína og hún er ofboðslega flottur einstaklingur og gaman að þessar ungu stelpur í Val geti horft upp til hennar,“ sagði Ingibjörg Jakobsdóttir.

Það má horfa á umfjöllunina um tímamót Guðbjargar hér fyrir ofan.