Sím­talið við Ingu skráð í skjala­kerfi skólans

Greint var frá því í gær að Ársæll Guðmundsson skólameistari Borgarholtsskóla muni brátt ljúka störfum en hann tjáði starfsfólki í tölvupósti að Guðmundur Ingi Kristinsson menntamálaráðherra hefði ákveðið að auglýsa embættið laust til umsóknar. Samkvæmt svörum aðstoðarmanns ráðherra var það vegna breytinga á framhaldsskólakerfinu. Ársæll segist telja að Inga Sæland félags-og húsnæðismálaráðherra hafi beitt sér fyrir ákvörðuninni en símtal þeirra á milli um týnt skópar barnabarns hennar komst í fréttir í janúar.

Þrennt komi til greina

„Ef maður lítur til baka og spyr sig: Af hverju í ósköpunum er ég einn skólameistara beittur þessu ákvæði sem aldrei hefur verið beitt og búið var að lýsa því yfir að yrði ekkert beitt, og maður lítur til baka skoðar hvað það er, þá er það eina sem hefur komið upp þetta a stóra skólamál sem, Inga Sæland fór mikinn í fjölmiðlum um og bæði um, bæði skómálið og mig sem skólastjóra, sem er mjög óverðugt.“

Hann hafi auk þess gagnrýnt hugmyndir ráðherra um breytingar á framhaldsskólakerfinu og tjáð sig um stefnu gagnvart fötluðum nemendum. Ráðherra hafi á engum tímapunkti tjáð honum um óánægju með hans störf.

„Þannig að ég dreg þessa ályktun, já. Að það hljóti að vera, en auðvitað þarf ráðherra sjálfur að svara fyrir þetta. Hann kom ekki á fundinn þegar ég fékk afhent þetta bréf og gaf mér ekkert færi á að eiga í einhverju samtali um mín störf eða af hverju hann, hefði komist að þessari niðurstöðu. Þannig að ég er mjög í lausu lofti náttúrulega.“

Inga hafi farið með rangt mál um símtalið

Fréttastofa hefur sent menntamálaráðuneytinu fyrirspurn um skipan annarra skólameistara. Ársæll tjáði sig í fyrsta sinn efnislega um símtalið við Ingu í Morgunblaðinu í dag og sagði ráðherrann hafa hótað því að hafa samband við lögreglu og vísað til þess að hún hefði mikil ítök í lögreglunni. Fréttastofa ræddi málið við Ingu í janúar og var skrifað orðrétt:

Varstu hvatvís í þessu símtali og minntist á það að þú hefðir sambönd sem ráðherra og jafnvel við lögregluna? 

„Nei, það gerði ég ekki. Það er orðum aukið,“ segir ráðherra. Hún kannist hins vegar við að hafa verið mjög ákveðin eins og henni væri eðlislægt. Amman hefði átt að hugsa sig betur um áður en hún tók upp símtólið.

Frétt úr kvöldfréttum Sýnar um málið í janúar:

Símtalið til á minnismiða

Hann segist hafa ákveðið á sínum tíma að tjá sig ekki um símtalið, það væri ekki hagur neins, hvorki nemenda skólans né ráðherra.

„Samt hélt Inga Sæland í framhaldinu áfram og sagði í einhverjum viðtölum hver væri ábyrgð skólastjórans og einhverjar fráleitar vangaveltur sem voru bara ósannindi. Samt ákvað ég að segja ekki neitt, til heilla fyrir nemendur og skólann og taldi engum greiða gerður en þegar nú er svona komið þá er bara rétt að alþjóð fái að vita hvernig þetta símtal var. Þannig að ráðamenn geta svo bara rætt það og ég trúi ekki öðru en að Inga Sæland segi satt og rétt frá.“

Er til upptaka af þessu símtali?

„Það er engin upptaka en ég skráði símtalið strax á minnismiða sem er í skjalavistunarkerfi skólans eins og við gerum í svona og innihald þess. Þannig þetta er allt skráð í skjalakerfi skólans, allt þetta mál,“ segir Ársæll.

„En mér þykir mjög leiðinlegt að einhver starfsmaður hjá mér hafi séð sér fært að brjóta trúnað gagnvart nemendum og skólanum því það eru allir bundnir þagnarskyldu sem vinna í skólum og með börn. Ég veit ekkert hvaða starfsmaður það er sem gerði þetta og sagði meira að segja að ég hefði haldið einhverjar ræður á kaffistofu skólans og svo framvegis sem er ekki rétt en við ræddum þetta innan skólans að sjálfsögðu, þetta er stórmál.“