Kúa­bændur skora á ráð­herra að falla frá breytingum

Í drögum að frumvarpinu sem liggur frammi í samráðsgátt stjórnvalda er meðal annars lagt til að ákvæði sem heimilar sameiningu í mjólkuriðnaði verði lagt niður. Bændasamtökin hafa deilt áhyggjum bænda sem séu ánægðir með stöðu mála og lítist ekki á breytingar.

Varaformaður Bændasamtakanna sagði við Ríkisútvarpið í október að mjólkurbændum liði eins og þeir hefðu fengið kartöflu í skóinn.

„Fyrirkomulagið í mjólkurframleiðslu er bara mjög gott og það hefur ekki verið nein eftirspurn meðal bænda að fá breytingu á því,“ sagði Herdís Magna Gunnarsdóttir varaformaður samtakanna.

Baldur Helgi Benjamínsson kúabóndi réðst í söfnun undirskrifta vegna málsins og hefur nú safnað 489 undirskriftum sem til stendur að afhenda Hönnu Katrínu Friðriksson á föstudaginn. Í áskorun til ráðherra um að falla frá boðuðum breytingum segir:

„Með frumvarpinu er ráðist gegn því starfsumhverfi sem kúabændur hafa starfað eftir í um 20 ár og byggt allt framleiðsluskipulag og fjárfestingarákvarðanir á. Núverandi kerfi hefur skilað mikilli hagræðingu í mjólkurframleiðslunni og ávinningnum, sem nemur milljörðum króna á hverju ári, hefur verið skilað til neytenda í formi lægra vöruverðs og bænda í formi hærra afurðaverðs. Þetta hefur verið staðfest í skýrslum Hagfræðistofnunar HÍ,“ segir í áskoruninni.

„Auk þess hefur núverandi fyrirkomulag jafnað aðstöðu bænda gagnvart markaði, óháð búsetu. Með framlagningu frumvarpsins er atvinnuvegaráðherra að tefla þessum árangri í tvísýnu, skapa mikla óvissu um framhaldið og þannig setja greinina í fullkomið uppnám. Við skorum því á ráðherra að draga frumvarpið til baka.“

Af þeim 489 sem skrifuðu undir áskorunina eru einn eða fleiri rekstraraðilar af 295 búum sem Baldri Helga telst til að séu um 65 prósent kúabúa í mjólkurframleiðslu á Íslandi. Baldur Helgi telur að heildarfjöldi búanna sé 451.

Hann segir að eitthvað sé um undirskriftir fólks á listanum sem ekki séu kúabændur.