„Varnar­sigur“ að fá inn texta um sam­ráð um á­hrif tollanna

Aðildarríki Evrópusambandsins samþykktu tillögu framkvæmdastjórnar þess um tímabundnar verndaraðgerðir í þágu járnblendisframleiðslu í álfunni í dag. Hvorki Noregur né Ísland fengu undanþágu frá aðgerðunum þrátt fyrir að löndin tvö séu í evrópska efnahagsbandalaginu.

Álfheiður Ágústsdóttir, forstjóri Elkem sem rekur kísilmálmver á Grundartanga, segir niðurstöðuna vonbrigði að Ísland sé skilið eftir yfir utan og teljist ekki hluti af innri markaði ESB. Íslensk og norsk stjórnvöld hafi engu að síður gert allt sem í þeirra valdi stóð til þess að verja iðnaðinn.

Þá sagði í tilkynningunni að framkvæmdastjórnin ætlaði að eiga í samráði við Íslendinga og Norðmenn á þriggja mánaða fresti þar sem áhrif aðgerðanna yrðu metin.

Álfheiður telur það vissan varnarsigur að hafa náð þessum texta inn í aðgerðirnar.

„Að ná þessum texta inn og síðan þegar áhrifin fara að koma fram að möguleika að taka samtölin er mjög gott. Sannarlega betra en ef þessi texti hefði ekki bæst við,“ segir hún.

Selja einnig til Ameríku og Asíu

Þrátt fyrir að Ísland og Noregur séu ekki undanþegin aðgerðum sagði framkvæmdastjórnin í tilkynningu í dag að þær séu hannaðar þannig að þær hafi lítil áhrif á virðiskeðjur í Evrópu. Ísland og Noregur framleiða stóran hluta þess kísilmálms sem fluttur er til álfunnar.

Álfheiður segir erfitt að segja til um áhrif aðgerðanna á Elkem á Íslandi til lengri tíma. Bæði sé hægt að teikna upp jákvæðar og neikvæðar sviðsmyndir.

„Það verður allt svolítið að ráðast hvernig markaðirnir munu svara okkur,“ segir hún.

Til skamms tíma selji fyrirtækið einnig inn á Ameríku- og Asíumarkað.

„Við munum auðvitað reyna að raða púslunum okkar upp eftir því,“ segir forstjórinn..