Hafa tekið U-beygju með Hauka-Kanann sem þær ráku nánast í upp­hitunarþættinum

Haukar unnu nýliða KR á Meistaravöllum, 70-92, í 2. umferð Bónus deildarinnar í fyrradag. Freeman skoraði 24 stig og nýtti níu af fjórtán skotum sínum.

Þær Hallveig Jónsdóttir og Berglind Gunnarsdóttir fannst ekki mikið til Freeman koma fyrst í stað en hafa skipt um skoðun.

„Haddý sagði áðan: Djöfull er ég búin að éta sokk,“ sagði Berglind Gunnarsdóttir.

„Okkur til varnar þá voru það eiginlegar orðnar opinberar upplýsingar að Haukar væru byrjaðir að leita annað. Við vorum búnar að sjá hana alveg hrottalega lélega á undirbúningstímabilinu. En hún er bara búin að vera drulluflott í þessum tveimur leikjum sem eru búnir af tímabilinu,“ sagði Hallveig.

Hún er þó enn ekki alveg sannfærð um að Freeman sé rétti Bandaríkjamaðurinn fyrir Hauka.

„Mér finnst hún ekki enn vera leikmaður sem passar beint inn í Haukaboltann. Það breytir ekki þeirri skoðun minni en hún er flottur leikmaður og sokkur á mig,“ sagði Hallveig.

Í fyrstu tveimur deildarleikjum sínum fyrir Hauka er Freeman með 23,5 stig og 7,5 fráköst að meðaltali. Hún er með 69,6 prósent skotnýtingu inni í teig og með hundrað prósent nýtingu í þriggja stiga skotum og vítaskotum.

Haukar eru með fullt hús stiga í 2. sæti Bónus deildarinnar. Næsti leikur liðsins er gegn Grindavík í Ólafssal á þriðjudaginn.

Innslagið úr Bónus Körfuboltakvöldi má sjá í spilaranum hér fyrir ofan.