Hægur vindur og skúrir eða slyddu­él

Á vef Veðurstofunnar segir að hiti verði á bilinu þrjú til tíu stig að deginum og mildast fyrir austan.

„Vestan 5-13 m/s á morgun og víða skúrir eða él, en bjart að mestu suðaustantil. Styttir smám saman upp seinnipartinn. Heldur kólnandi veður.

Á miðvikudag gengur svo í allhvassa eða hvassa vestanátt með rigningu, og síðar skúrum eða slydduéljum. Samkvæmt nýjustu spám gæti slegið í storm við suðurströndina þegar líður á daginn og eru ferðalangar hvattir til að fylgjast með veðurspám,“ segir í tilkynningunni.

Veðurhorfur á landinu næstu daga

Á þriðjudag: Vestan 5-13 m/s og skúrir eða él, en þurrt suðaustantil. Suðlægari síðdegis og yfirleitt úrkomulítið. Hiti 2 til 8 stig, mildast á Suðausturlandi.

Á miðvikudag: Gengur í vestan 13-23, hvassast sunnantil. Víða rigning, en skúrir eða slydduél eftir hádegi og styttir upp um landið suðaustanvert. Hiti 3 til 9 stig.

Á fimmtudag: Snýst í suðvestan 8-15. Bjart með köflum, en fer að rigna sunnan- og vestanlands síðdegis. Heldur hlýnandi.

Á föstudag: Suðvestanátt og súld eða rigning, en úrkomulítið á Suðaustur- og Austurlandi. Milt í veðri.

Á laugardag og sunnudag: Hlý suðlæg átt og súld eða dálítil rigning, en þurrt að mestu á Norður- og Austurlandi.