Bene­dikt gefur Stjörnunni ráð: Alls ekki hringja í eldri bróðurinn

Benedikt gerði Tindastól að deildarmeisturum í fyrsta sinn í sögu félagsins og fór með liðið alla leið í oddaleik um Íslandsmeistaratitilinn þar sem liðið tapaði á móti Stjörnunni.

Í upphitunarþætti Körfuboltakvölds fyrir leiktíðina var Benedikt spurður út í grísku bræðurna sem spiluðu fyrir Tindastól á síðustu leiktíð.

Sá yngri, Giannis Agravanis, byrjaði tímabilið vel og var öflugur með 14,7 stig að meðaltali í leik. Hann skipti um gír um áramót og var þá enn öflugri.

Sá eldri, Dimitrios Agravanis, kom hins vegar til liðsins á miðju tímabili og það er óhætt að segja að tími hans á Króknum hafi verið skrautlegur. Flestir voru sammála um að þar hafi Stólarnir keypt köttinn í sekknum.

Góði bróðurinn mættur í Garðabæinn

Giannis Agravanis spilar áfram á Íslandi en hann gerði samning við Stjörnuna í sumar.

„Förum bara í leikmann, sem við þekkjum og þú þekkir sérstaklega vel. Góði bróðirinn, Giannis Agravanis. Hann er mættur í Garðabæinn. Hvað kemur hann með inn í þetta lið Íslandsmeistaranna,“ spurði Stefán Árni Pálsson þáttastjórnandi.

„Það er bara hellingur. Þetta er frábær undirskrift hjá Stjörnunni. Fyrir mér var hann, sérstaklega eftir áramót, örugglega bara besti leikmaður Tindastólsliðsins. Hann er klæðskerasniðinn í þessa deild,“ sagði Benedikt.

Getur verið besti varnarmaður deildarinnar

„Hann getur spilað sem lítill framherji og hann getur spilað sem kraftframherji. Hann getur verið besti varnarmaður deildarinnar þegar hann ætlar sér það. Hann getur dekkað leikstjórnanda og hann getur dekkað upp fyrir sig.,“ sagði Benedikt.

„Hann er góður sendingamaður og hann getur skorað á marga vegu. Ef hann kemst á vinstri hendina þá er varla hægt að stoppa hann,“ sagði Benedikt.

Það er bara eitt ...

„Það er bara eitt sem ég verð að ráðleggja Stjörnumönnum og ég vona að þeir séu að hlusta. Ef hann spyr hvort að bróðir hans megi klára tímabilið hérna, segja þá bara absalútt nei. Alla vega að heyra í mér áður en þeir taka ákvörðunina,“ sagði Benedikt og mikið var hlegið.

Það má hlusta á umræðuna um Agravanis bræðurna hér fyrir ofan.