Breytingar á toll­skrá megi ekki grafa undan ís­lenskri fram­leiðslu

Greint var frá því í dag að fjármálaráðherra hefði ákveðið að leggja fram frumvarp um að breyta tollflokkun pítsaostsins til samræmis við ákvörðun Alþjóðatollastofnunarinnar um flokkun vörunnar. Þetta hefði komið fram í bréfi þess efnis til Eftirlitsstofnunar EFTA, ESA, sem sendi Íslandi formlegt áminningarbréf í apríl vegna rangrar tollflokkunar ostsins, sem sagt var að hamlaði frjálsu flæði vara.

Málið á sér langa forsögu sem hófst árið 2020 þegar heildsala hér á landi hóf innflutning pítsaosts með íblandaðri jurtaolíu, en miklar deilur hafa staðið yfir um tollflokkun hans síðan.

Hægt er að lesa meira um söguna hér:

Breytingar á flokkun feli ekki í sér afnámi tolla

Í tilkynningu frá Samtökum fyrirtækja í landbúnaði segir að í bréfi fjármálaráðuneytisins til ESA andmæli ráðuneytið réttilega þeirri niðurstöðu ESA að Ísland hafi ekki uppfyllt skyldur sínar og mótmæli rangfærslum sem þar hafi komið fram.

„Athygli vekur að ráðuneytið kýs í niðurlagi bréfsins að tilkynna ESA um áform um breytta tollflokkun vörunnar í samræmi við álit WCO, þó ekki verði séð að til þess standi sérstök nauðsyn.“

Samtök fyrirtækja í landbúnaði geri ráð fyrir að boðuð breytingh á tollflokkun feli ekki í sér afnám tolla á vöruna, enda standi engar skuldbindingar til þess.

„Boðuð breyting felur ekki í sér afnám tolla. Það er vel hægt að ákvarða toll á ný tollnúmer og við gerum ráð fyrir að svo verði gert í þessu tilfelli,” segir Margrét. “Það er því alveg ljóst að vel er hægt að gæta áfram að samkeppnishæfni innlendrar framleiðslu sé pólitískur vilji fyrir því. Við höfum ekki fundið annað frá stjórnvöldum en að svo sé,“ er haft eftir Margréti Gísladóttur í tilkynningu.