Trump-tollarnir hafa tekið gildi

„Það er miðnætti! Milljarðar dala streyma nú til Bandaríkjanna vegna tollanna,“ sagði Trump á samfélagsmiðli sínum Truth Social fáeinum mínútum áður en fresturinn til samninga rann út á miðnætti.

Bandaríkjastjórn birti í síðustu viku uppfærðan lista með verndartollum á vörum frá ríkjum heims sem myndi taka gildi ef ekki myndi nást samkomulag um milliríkjaviðskipti við Bandaríkin fyrir 7. ágúst.

Breska ríkisútvarpið greinir frá því að forsetinn hafi nú einnig tilkynnt um fimmtíu prósenta toll á vörum frá Indlandi, frá og með 27. ágúst, hætti indversk stjórnvöld ekki að kaupa olíu frá Rússlandi.

Þá hefur Trump hótað að setja á 100 prósenta toll á erlendar tölvuflögur, en hann hefur þrýst á bandarísk tæknifyrirtæki að fjárfesta í auknum mæli í Bandaríkjunum. Forstjóri tæknirisans Apple greindi frá því í gær – á fréttamannafundi í Hvíta húsinu að Trump viðstöddum – að fyrirtækið ætli sér að auka fjárfestingar sínar í Bandaríkjunum um 100 milljarða Bandaríkjadala.

Til að jafna leikinn

Stjórnvöld í þeim ríkjum sem verndartollarnir ná til hafa reynt að ná samkomulagi við Bandaríkjastjórn síðustu vikurnar til að ná fram lækkun eða sleppa alveg við það sem Trump hefur kallað „gagnkvæma tolla“. Forsetinn vill meina að önnur ríki hafi á síðustu áratugum komið fram við Bandaríkin með óréttlátum hætti í viðskiptum og að nauðsynlegt sé að jafna leikinn.

Nokkur ríki hafa þegar náð samkomulagi við Bandaríkin, þar með talið Bretland, Japan og Suður-Kórea. Evrópusambandið hefur sömuleiðis náð samkomulagi um ramma sem felur í sér 15 prósenta toll á vörum frá Evrópu til Bandaríkjanna.

Mikil vonbrigði

Kristrún Frostadóttir forsætisráðherra lýsti hækkunum tolla á útflutningsvörur til Bandaríkjanna sem miklum vonbrigðum í kvöldfréttum Sýnar í gær. Stjórnvöld hafi ekki enn hafið formlegar viðræður við bandarísk yfirvöld þeirra vegna en að þrýst sé á um að þær hefjist sem fyrst.

Forsætisráðherra sagði breyttan veruleika blasa við í alþjóðaviðskiptum og að þjóðir heimsins væru að fóta sig í nýjum heimi. Vöruútflutningur Íslendinga til Bandaríkjanna frá árinu 2020 og til dagsins í dag nema tæplega 430 milljörðum króna og því væri ljóst að mikið sé undir. Lyf, lækningavörur og þjónusta enn sem komið er undanþegin tollum en Ísland flytur talsvert út af lyfjum vestur um haf.