Íslendingaliðið kláraði sitt en Füchse Berlin er samt meistari í fyrsta sinn

Íslendingaliðið Magdeburg vann sinn leik en varð að sætta sig við að enda í öðru sætinu.

Füchse Berlin vann fimm marka sigur á Rhein-Neckar Löwen, 38-33, og tryggði sér titilinn.

Magdeburg vann á sama tíma tíu marka sigur á Bietigheim, 35-25, þar sem Ómar Ingi Magnússon skoraði sex mörk. Gísli Þorgeir Kristjánsson gat ekki spilað vegna meiðsla. Felix Claar var markahæstur hjá liðinu með átta mörk.

Füchse Berlin var með eins stigs forskot á Magdeburg fyrir umferðina og líka með betri innbyrðis stöðu. Refunum nægði því jafntefli í leiknum en það gekk ekki vel framan af.

Rhein-Neckar Löwen byrjaði mjög vel og komst mest fjórum mörkum yfir í fyrri hálfleiknum. Löwen var þremur mörkum yfir í hálfleik, 20-17.

Füchse sneri leiknum við með því að skora sex mörk í röð um miðja seinni hálfleik og breyta stöðunni úr 26-22 í 26-28. Eftir það var sigurinn aldrei í mikilli hættu. Füchse vann seinni hálfleikinn 21-13.

Füchse Berlin hefur aldrei orðið meistari áður en liðið endaði í öðru sæti á síðasta tímabili og varð í þriðja sætið á tímabilinu á undan því.

Daninn Mathias Gidsel fór að venju á kostum með Füchse en hann skoraði tíu mörk í leiknum í kvöld. Tim Freihöfer var markhæstur ellefu mörk en átta þeirra komu úr vítum.

Þetta er þriðja tímabil Gidsel með Berlínarliðinu og liðið hefur hækkað sig í töflunni á hverju ári.