Lægð nálgast sem dýpkar ört

Á vef Veðurstofunnar segir að þessi lægð muni valda norðan óveðri á landinu á næstunni. Versta veðrinu er spáð aðfaranótt þriðjudags og á þriðjudaginn.

Gular og appelsínugular veðurviðvaranir verið gefnar út. Gular viðvaranir taka gildi vegna norðan hríðar eða snjókomu á norðan og austanverðu landinu í dag, en þær appelsínugulu á norðan-, austan- og suðaustanverðu landinu aðfararnótt morgundagsins.

Spáin í dag gerir ráð fyrir að það gangi í norðan strekking, tíu til átján metrum á sekúndu.

„Rigning eða slydda með köflum um landið norðanvert og snjókoma til fjalla. Það rignir á Suðausturlandi fram á kvöld, en suðvestantil verður væntanlega þurrt. Veður fer kólnandi í dag og í kvöld og nótt má búast við samfelldri slyddu eða snjókomu á Norðaustur- og Austurlandi þegar bætir í úrkomu á þeim slóðum,“ segir í hugleiðingum veðurfræðings.

Á morgun er útlit fyrir norðan hvassviðri nokkuð víða, en stormur í vindstrengjum við fjöll á suðurhelmingi landsins. Snjókoma eða slydda norðan- og austantil á landinu um morguninn, en síðan hlýnar lítillega sem veldur því að úrkoman fer yfir í rigningu í láglendi og verður hún væntanlega í talsverðu magni. Sunnan heiða verður minni úrkoma, en einhver þó. Hiti á morgun 1 til 9 stig, kaldast í innsveitum fyrir norðan.

Áðurnefnd lægð ætlar síðan að verða þaulsetin austan við landið og þó hún verði farinn að grynnast og mesti vindurinn úr henni eftir miðja vikuna, þá eru líkur á að hún nái að viðhalda norðlægri átt með úrkomu og köldu veðri á norðanverðu landinu fram í vikulokin.

Veðurhorfur á landinu næstu daga

Á þriðjudag: Norðan 13-23 m/s, hvassast í vindstrengjum á suðurhelmingi landsins. Snjókoma eða slydda norðan- og austantil á landinu um morguninn, en síðan talsverð rigning á láglendi og slydda eða snjókoma til fjalla. Úrkomuminna sunnan heiða. Hiti 1 til 9 stig, kaldast í innsveitum norðanlands.

Á miðvikudag: Norðanátt, víða á bilinu 10-15 m/s. Rigning á norðanverðu landinu og hiti 2 til 7 stig. Þurrt sunnantil með hita 7 til 13 stig.

Á fimmtudag: Norðan 5-13 og rigning eða slydda með köflum, en þurrt á sunnanverðu landinu. Hiti breytist lítið.

Á föstudag: Norðan 3-10 og lítilsháttar rigning eða slydda norðanlands, en líkur á síðdegisskúrum sunnantil. Áfram kalt í veðri, einkum fyrir norðan.

Á laugardag og sunnudag (hvítasunnudagur): Fremur hæg norðlæg átt. Dálítil rigning eða slydda af og til á norðanverðu landinu, en skýjað með köflum og skúrir syðra. Hiti breytist lítið.