Skilti Vega­gerðarinnar morandi í villum: „Er ekkert gæða­eftir­lit hjá ykkur?“

„Þetta glæsilega skilti sem Vegagerðin reisti nýverið er fyrirtaks dæmi um nokkrar algengari stafsetningar- og málfarsvillur okkar fallega tungumáls,“ skrifaði Pálmi Kormákur og birti mynd af skiltinu í Facebook-hópnum Málspjallinu.

Þá sagði hann þá lýsingu að tala um veg sem liggi um heiði, frekar en að þvera hana, vekja upp áhugavert ósamræmi í máltilfinningu sumra. „Hvað kemur þú auga á margar villur?“ spurði Pálmi svo notendur Málspjallsins.

Allavega fimm villur, ef ekki fleiri

Fjöldi fólks listaði upp villurnar á skiltinu í ummælum við færsluna. Þar á meðal Davíð Oddsson, þó ekki stjórnmálamaðurinn, sem taldi alls fimm villur en sá ekkert að því að talað væri um að vegurinn lægi um heiðina. 

Villurnar voru eftirfarandi samkvæmt Davíð Oddssyni:

1. Auka R í VESTFJARÐA(R)VEGUR
2. Stafavíxl; ka(lf)a.
3. Punktur í stað tvípunkts: Verklok(.)
4. Vantar punkt á eftir 30 (þrítugasti).
5. Það er óhefðbundið að nota stóran staf í mánaðaheitum (September).

Aðrir töldu sig finna enn fleiri villur, of mikið bil væri á eftir kommu í 8,0 km, hástafir væru ofnotaðir og bil væru víða of mikil.

Flestallir sem skrifuðu ummæli við færsluna hneyksluðust á vinnubrögðunum. Þar á meðal sagði Kjartan Eggertsson skiltið vera „dapurt dæmi“ um hvert stefnir.

„Þetta er fyrst og fremst dæmi um ófyrirgefanlega hroðvirkni. Ekkert af þessu er dæmi um málbreytingar,“ svaraði þá Eiríkur Rögnvaldsson, prófessor emeritus í íslenskri málfræði við Háskóla Íslands.

Frágangurinn til skammar

Eiríkur, sem mörgum harðlínumönnum málfarseftirlits hefur þótt taka of mjúkum höndum á vitlausu málfari fólks, tók málið hins vegar engum vettlingatökum og tók Vegagerðina á teppið.

„Gagnrýni á málfar einstaklinga er óheimil í þessum hópi en hér gegnir öðru máli. Hér er það opinber stofnun sem á í hlut og þessi frágangur er til skammar. Hvað segir þú um þetta, G. Pétur Matthíasson? Er þetta forsvaranlegt?“ spurði hann í öðrum ummælum og merkti upplýsingafulltrúa Vegagerðarinnar sérstaklega.

„Nei þetta er ekki í lagi, það er búið að taka skiltið niður,“ svaraði upplýsingafulltrúinn G. Pétur.

„Gott - en ég skil bara ekki hvernig svona getur gerst. Er ekkert gæðaeftirlit hjá ykkur?“ spurði Eiríkur þá.

„Verktakinn útbýr skiltin sem er þó engin afsökun fyrir okkur, því auðvitað eigum við að hafa eftirlit með þessu einsog öllu öðru. Þannig að þetta er hvatning um að gera betur og ég verð að tryggja að við í samskiptadeildinni verðum fengin til að lesa yfir í framtíðinni,“ svaraði G. Pétur þá.

Aðrir slógu hins vegar á léttari strengi í umræðuþræðinum.

Rauður penni nauðsynlegur og fróðleg kalfalengd

„Í öllum hanskahólfum ætti að vera rauður tússpenni, svo ökumenn geti brugðist snarlega við svona skiltleysum,“ skrifaði Einar Baldvin Pálsson við færsluna.

Illuga Jökulssyni, dagskrárgerðarmanni, fannst fróðlegt að fá upplýsingar um kalfalengd.

„Mér finnst nú engin ástæða til að gera of mikið veður út af þessu. Það er til dæmis fróðlegt að fá þó þetta nákvæmar upplýsingar um lengd kalfa,“ skrifaði hann.

Jóhann Hlíðar Harðarson, túlkur og fyrrverandi fréttamaður, stríddi G. Pétri aðeins og skrifaði: „Hannaðir þú þetta skilti G. Pétur?“

„Ekki svo gott - en ég lét taka það niður 😊“ svaraði upplýsingafulltrúinn sem þurfti þó á endanum að draga í land:

„Var að fá nýjar upplýsingar, skiltið verður ekki tekið niður heldur mun verktakinn líma nýjan texta yfir allt skiltið - vonandi gengur það fljótt og vel fyrir sig. Villulaust.“