Opni Ísraelar ekki fyrir mann­úðar­að­stoð „þá verða að vera þvinganir“

Nokkuð fjölmenn og kröftug mótmæli fóru fram við utanríkisráðuneytið í morgun þar sem mótmælendur kröfðust þess meðal annars að Íslendingar þrýsti á bandaþjóðir um að koma á alþjóðlegum þvingunaraðgerðum gegn Ísrael.

Á sama tíma standa íbúar á Gaza frammi fyrir óbærilegri bið eftir hjálpargögnum. Um hundrað vörubílum með ýmsar nauðsynjavörur á borð við barnamat og sjúkragögn var hleypt inn á svæðið í gær og í fyrradag. Gögnin hafa þó ekki komist til skila.

Ísraelar vísa til þess að unnið sé að leiðum til að tryggja að Hamas-liðar komist ekki í neyðaraðstoðina. Mannréttindasamtök segjast hins vegar í kappi við tímann. Nær engin hjálpargögn hafa farið inn á svæðið í ellefu vikur og þúsundir barna nú eigi á hættu að látast vegna vannæringar á næstu dögum og barist er um hvern bita.

Yfir áttatíu hafa verið drepin í árásum Ísraelshers á Gaza síðasta sólarhringinn, þeirra á meðal eru tveggja ára barn og viku gamalt barn.

Horft upp á þjóðernishreinsanir bregðist alþjóðsamfélagið ekki við

Erla Björg Gunnarsdóttir fréttaþulur ræddi við Þorgerði Katrínu Gunnarsdóttur utanríkisráðherra, sem er stödd í Brussel, í kvöldfréttum Stöðvar 2.

Þarna kölluðu mótmælendur nafn þitt hátt og skýrt. Þeir kalla líka eftir þvingunaraðgerðum, viðskiptaþvingunum og sniðgöngu í íþrótta- og menningarsamstarfi. Hver eru svör þín við þessu?

„Ég hefði gjarnan viljað vera einmitt heima til þess að fara út og spjalla við fólkið sem var eðlilega að mótmæla. Ég skil að þau mótmæli þessari hræðilegu aðstöðu og aðstæðum sem fólkið á Gasa býr við núna og það er erfitt að horfa upp á þetta,“

„En það sem við höfum verið að gera er til að mynda það sem við gerðum fyrir tveimur vikum þar sem við vorum sex utanríkisráðherrar að byrja að skapa þrýsting. Nægilega mikinn þrýsting sem fylgdi í kjölfarið með því að sjö forsætisráðherrar eru að setja þrýsting á Ísrael,“ sagði hún.

Evrópusambandið taki nú mikilvæg skref til að auka þrýsting á Ísrael.

„Ein og sér, kannski ekki svo mikill árangur en við erum að fá fólk með því að tala og skapa þrýsting með Noregi og öðrum ríkjum svo Ísraelar fari að opna aðeins faðminn og opni fyrir þessum bílum með þessi hjálpartæki og mannúðaraðstoð. Við erum annars að horfa upp á óbærilegt ástand,“ sagði Þorgerður.

„Ef alþjóðasamfélagið ætlar ekki að bregðast harðar við þá erum við að horfa upp á þjóðernishreinsanir á Gasa og það er algjörlega ólíðandi.“

Takturinn að breytast

Þorgerður fundaði í dag með Kaju Kallas, utanríkismálastjóra ESB, og EFTA-ríkjunum og segir ljóst að Evrópusambandið sé að stíga fastar niður. Í vikunni hafi hún og 23 utanríkisráðherrar landa og ríkjasambanda tekið þátt í því að gagnrýna Ísrael.

„Það er að breytast takturinn, ég fann það á fundi sem ég hef átt bæði með NATO og Evrópuráðinu í vikunni að það verður að fara að gera eitthvað. Þetta gengur ekki,“ sagði Þorgerður.

„Og ég vil minna líka á að Tom Fletcher, yfirmaður OCHA, og Alþjóðaheilbrigðismálastofnunin hafa bent á það, alveg andstætt því sem Ísraelar hafa verið að segja, að ef þetta heldur svona áfram verður gríðarleg hungursneyð og við getum ekki horft upp á það.“

Hún skilji því vel mótmælin í dag og sér finnist miður að hafa ekki getað talað við mótmælendur.

„Þá er það á ábyrgð allra“

Það er kominn harðari tónn í þjóðarleiðtoga. Munum við sjá meira, munu mótmælendur og þeim sem er umhugað um þetta fólk sjá aðgerðir, fleiri skref og skýr?

„Það verða að vera fleiri skref. Það er meðal annars það sem við sögðum á fundinum í dag. Ef Ísraelar ætla ekki að opna fyrir mannúðaraðstoð þá verða að vera þvinganir í kjölfarið. Við verðum að fara að gera eitthvað meira heldur en að tala, það verða að vera þvinganir til þess að koma mannúðaraðstoð á svæðið,“ sagði Þorgerður.

„Ellegar er það einmitt þannig að það munu börn, konur, fatlaðir og fólk deyja á Gasa. Og þá er það á ábyrgð allra, allra.“