Lík­lega stærsta eignasala ríkis­sjóðs frá upp­hafi

Daði Már Kristófersson, fjármála- og efnahagsráðherra, ákvað í dag að nýta heimild til klára sölu á öllum eignarhlut ríkisins í Íslandsbanka í ljósi mikillar eftirspurnar en einnig stóð til boða að selja hluta af honum síðar. Hörður Ægisson, ritstjóri Innherja, segir þessa ákvörðun ekki hafa komið sér á óvart.

„Maður fann það strax á fyrsta degi útboðsins og enn þá meira í gær að það var að myndast gríðarlega mikil stemning fyrir útboðinu og þá sérstaklega hjá almenningi, minni fjárfestum, sem njóta forgangs í útboðinu. Þannig að manni þótti líklegt að ríkissjóður myndi stækka útboðið upp í hámarkið sem það hefur gert og það þýðir að það er verið að selja fyrir að lágmarki 90 milljarða,“ sagði Hörður í fréttum Stöðvar 2 í kvöld.

Enn sé óljóst hvað söluverðið verður í tilboðsbókum B og C sem séu ætlaðar stærri fjárfestum á borð við lífeyrissjóði, verðbréfasjóði og erlenda fjárfesta. 

„Þeir hafa væntanlega skilað inn tilboði á hærra verði heldur en almenningur og þar af leiðandi gætu þessir níutíu milljarðar orðið kannski nálægt 100 milljörðum. Ég held að þetta sé líklega stærsta eignasala ríkisins frá upphafi.“

Íslandsbanki að fullu kominn í einkaeigu

„Við sáum þegar ríkið hratt af stað söluferli á Íslandsbanka sumarið 2021 þá er um að ræða stærsta frumútboð í Íslandssögunni upp á 55 milljarða og núna er þetta sala sem er næstum tvöfalt stærri. Að mínu viti er þetta jákvætt hvað það varðar að þarna er bundinn endi á eignarhald sem hefur nú verið í sautján ár samfellt sem hefur verið að meirihluta fyrst í eigu slitabús gömlu bankanna og síðan ríkissjóðs. Svo núna er þessi banki að fullu kominn í einkaeigu,“ bætir Hörður við.

Erfitt sé að leggja mat á það á þessari stundu hvort það hafi verið skynsamleg ákvörðun hjá stjórnvöldum að ganga frá sölu á öllum hlutum í Íslandsbanka á einu bretti.

„Við höfum ekki nægilega miklar upplýsingar um það hvernig tilboðin sem liggja á borðinu líta út. Það skiptir máli þegar útboðið er búið og kaupendur fá afhend bréfin sín í næstu viku að það hafi verið nægjanlega mikil umframeftirspurn í tilboðsbókum B og C hjá stærri fjárfestum sem hafi réttlætt það að selja allan hlutinn. Að öðrum kosti þá er alltaf hætta á því að ef þessir fjárfestar hafa ekki sýnt gríðarlega mikinn áhuga, eins og almenningur, að gengið kunni þá að vera undir þrýstingi til lækkunar. Við vitum það ekki,“ segir Hörður.

„Ég trúi ekki öðru heldur en að ráðgjafar ríkissjóðs í þessu ferli hafi ekki mælt með því að selja allan hlut nema það hafi verið staðan. Mér fannst alltaf liggja fyrir þegar söluferlið hófst að það væri mjög líklega mikil pólitísk freisting af hálfu seljandans, ríkisins, ef það gæfist færi á því að selja allan hlutinn á einu bretti og þurfa ekki að gera þetta að nýju.“

Skili ríkissjóði meiru á þessu ári en gert var ráð fyrir 

Stjórnvöld hyggjast nýta söluandvirðið til að greiða niður skuldir ríkissjóðs og hefur verið gert ráð fyrir sölunni í fjárlögum og fjármálaáætlun.

„Ég held að ég fari rétt með að takist að selja hlutinn á einu bretti núna fyrir mögulega hátt í hundrað milljarða þýðir að ríkið er að fá meira í sinn hlut á þessu ári heldur er áætlað. Það er jákvætt að lækka skuldahlutföllin fyrr heldur en ella og þýðir að ríkið verði þá umsvifaminni í að sækja sér fjármagn á skuldabréfamarkaði sem aftur þýðir mögulega að vextir á markaði gætu lækkað meira en ella,“ segir Hörður að lokum.