Ný stjórn Ungra um­hverfis­sinna kjörin

Þetta kemur fram í tilkynningu frá Ungum umhverfissinnum. Ný stjórn er eftirfarandi:

Forseti: Laura Sólveig Lefort Scheefer

Varaforseti: Snorri Hallgrímsson

Gjaldkeri: Sigurlaug Eir Beck Þórsdóttir

Fræðslufulltrúi: Julien Nayet-Pelletier

Hringrásafulltrúi:Antonia Hamann

Loftslagsfulltrúi: Ida Karólína Harris

Náttúruverndarfulltrúi: Jóhanna Malen Skúladóttir

Samskiptafulltrúi: Esther Jónsdóttir

Um nýjan forseta segir eftirfarandi í tilkynningunni:

„Laura Sólveig Lefort Scheefer tekur við embætti forseta af Snorra Hallgrímssyni. Hún gegndi áður stöðu hringrásarfulltrúa Ungra umhverfissinna og hefur víðtæka reynslu af teymisstjórn og félagastarfi, m.a. sem formaður Femínistafélagsins í MH, teymisstjóri hjá AIESEC, stjórnarmaður í AFS á Íslandi og sem forseti hringrásarnefndar UU. Hún hefur lokið háskólagráðu í umhverfisfræði, vinnur sem verkefnastjóri í sjálfbærni hjá fasteignafélaginu Heimar, hefur tekið þátt í rannsóknum á sviði náttúruverndar og hringrásarhagkerfis og farið fyrir hönd Ungra umhverfissinna einn af fulltrúum Íslands á loftslagsráðstefnu Sameinuðu þjóðanna, COP29.“

Fjölmörg verkefni afstaðin á liðnu ári

„Á líðandi starfsári óx félagið áfram og telur nú tæplega 1700 félaga. Sýnileiki okkar og vægi í almennri umræðu var mikið og komum við fram í fjölmiðlum 46 sinnum á starfsárinu - að meðaltali nánast í hverri viku! Einnig voru haldnir 20 viðburðir og unnin rúmlega 50 blaðsíðna umsagnarskrif við alls kyns frumvörp og aðra opinbera texta. Ráðist var í fjölmörg verkefni sem skiluðu miklum árangri og má þar nefna sem dæmi:“

• Kraftmikil þátttaka á COP16, ráðstefnu um líffræðilegan fjölbreytileika Sþ. í Cali, Kólumbíu, í október 2024, og COP29, loftslagsráðstefnu Sþ. í Baku, Aserbaídsjan, í nóvember 2024.
• COP Reykjavík - hátíð líffræðilegrar fjölbreytni og loftslagsaðgerða. Þar var efnt til pallborðsumræðna með fulltrúum allra þingflokka og unnið að tengingu málefna beggja ráðstefna (COP16 og COP29). Verkefnið var eitt fjölda stórglæsilegra verkefna sem hlutu styrk úr Loftslagssjóði ungs fólks í Reykjavík 2024.
• Önnur útgáfa af Sólinni, einkunnagjöf Ungra umhverfissinna fyrir Alþingiskosningar 2024, unnin á rúmum fjórum vikum eftir óvænt þingrof. Verkefninu er ætlað að upplýsa almenning og veita stjórnmálaflokkum aðhald með því að gera kvarða sem metur umhverfis- og loftslagsmál í stefnum allra stjórnmálaflokka.
• Ákall um bann við sjókvíaeldi, unnið í samstarfi við önnur samtök sem vakið hefur mikla athygli.
• Útgáfa Spírur - ungar raddir í umhverfismálum, þar sem birtar eru 30 sögur úr ritlistakeppni barna á grunnskólaaldri um allt land, Ungir rithöfundar fyrir umhverfið, sem félagið hélt síðastliðið haust. Verkefnið hlaut einnig styrk úr Loftslagssjóði ungs fólks í Reykjavík 2024.
• Auk þess má nefna regluleg greina- og umsagnaskrif, fundi með ráðherrum og fjölda erinda og viðburða (sjá ítarlega umfjöllun í ársskýrslu 2024-25 hér).

„Við lítum til komandi starfsárs með mikilli tilhlökkun og eru mörg spennandi verkefni í vinnslu, þ.á.m. þrjú verkefni sem hlutu nýlega styrk úr Loftslagssjóði ungs fólks í Reykjavík 2025, og fleiri hugmyndir að verkefnum sem ný stjórn mun framkvæma af mikilli ástríðu. Fráfarandi stjórn þakkar fyrir sig, stolt af árangri líðandi starfsárs, og nýkjörin stjórn tekur við keflinu með mikilli tilhlökkun. Við munum halda ótrauð áfram okkar baráttu fyrir náttúruvernd, loftslagsaðgerðum og lífvænlegri framtíð fyrir ungt fólk og framtíðarkynslóðir,“ segir í tilkynningu félagsins.