„Hef ekkert það miklar á­hyggjur af þessum breytingum“

Víkingi er spáð 2. sæti Bestu deildar karla í spá íþróttadeildar Vísis og Stöðvar 2. Víkingar töpuðu fyrir Blikum í úrslitaleik um Íslandsmeistaratitilinn í fyrra.

„Ég hef ekkert það miklar áhyggjur af þessum breytingum. Arnar var duglegur að koma sér í bann og við það myndaðist ákveðin reynsla hjá Sölva. Hann gerði frábæra hluti í þessum tveimur leikjum gegn Panathinaikos. Auðvitað er þetta samt allt öðruvísi, styttra milli leikja og þú hefur ekki allan þennan tíma til að undirbúa einn stóran leik á móti liði eins og Panathinaikos. En hann er búinn að vinna með Arnari öll þessi ár, hlera hann og ég held að hann hafi fengið að hafa sínar skoðanir á hlutunum. Hann er kannski reynslumeiri en fólk gerir sér grein fyrir,“ sagði Albert.

Albert segir að koma Gylfa Þórs Sigurðssonar í Víkingi sé algjör hvalreki fyrir liðið.

„Það er enginn leikmaður með jafn mikil gæði og Gylfi. Hann átti fínt tímabil í fyrra en getur betur en hann kom seint inn. Hann er í hörku standi núna. Við vitum að Sölvi er góður að setja upp föstu leikatriðin og það er enginn sem getur komið með betri bolta fyrir en Gylfi,“ sagði Albert.

„Segjandi það, þegar maður horfir til dæmis á Róbert Orra [Þorkelsson], Atla [Þór Jónasson] og Gylfa - ég tek Danna [Hafsteinsson] aðeins út úr þessu - þá eru þeir ekki búnir að spila marga leiki með liðinu. Þetta hefur verið aðeins öðruvísi undirbúningstímabil. Þeir drógu sig út úr Lengjubikarnum. Þeir eru ekki búnir að ná alvöru leikjum með liðinu og fyrstu leikirnir eru inni í Bestu deildinni. Það er ekki bara að Arnar sé farinn. Þetta eru líka Ari [Sigurpálsson], Gísli [Gottskálk Þórðarson] og [Danijel] Djuric; stórir póstar sem eru farnir frá Víkingi frá síðasta tímabili og það eru mögulega fleiri að fara. Þetta verður krefjandi tímabil hjá Víkingum.“

Víkingur fær ÍBV í heimsókn í fyrsta leik sínum í Bestu deildinni á mánudaginn.