Fundu þúsundir mynda, myndskráa og kynlífsdúkku sem lítur út eins og barn

Þetta kemur fram í ákæru á hendur Larsen sem birt var í dag af lögreglunni í Kaupmannahöfn og er fjallað um hana í dönskum miðlum. Í frétt DR kemur fram að hann hafi lýst yfir sakleysi sínu vegna ákærunnar.

Þar kemur einnig fram að af barnaníðsefninu sem fannst í hans fórum séu um 252 myndir flokkaðar í þriðja flokk og um 197 myndskrár. Um er að ræða efni sem er talið með því grófasta sem finnst en um er að ræða efni þar sem þolendur hafa mátt þola ofbeldi, nauðgun, þvingun, hótanir eða eitthvað slíkt.

Í ákærunni kemur einnig fram að efnið hafi fundist á heimili hans í júlí árið 2023 og að meira barnaníðsefni hafi fundist við aðra leit á heimili hans í febrúar í fyrra, 2024. Efnið fannst á tveimur tölvum, minnislykli og iPhone-farsíma.

Í tengslum við bók

Haft er eftir Peter Lundmark Jensen, lögmanni Larsen, í frétt DR að hvorki hann sé Larsen hafi nokkuð um málið að segja að svo stöddu. Í fréttatilkynningu sem hann sendi frá sér í gær kom fram að efnið hefði hann skoðað í tengslum við bók sem hann var að skrifa. 

Í fréttatilkynningunni kemur einnig fram að hann ætli sér að ljúka við bókina og þannig hreinsa nafn sitt af þessum ásökunum. Fréttatilkynninguna sendi hann frá sér í tilefni fjölmiðlaumfjöllunar um málið sem hófst á föstudag en þó án þess að nafn hans hefði verið birt með. Í frétt DR segir að um helgina hafi þó orðið ljóst að um hann væri að ræða.

Samkvæmt frétt DR liggur ekki fyrir hvaða refsingar saksóknari mun krefjast vegna brotanna en sérfræðingur fjölmiðilsins í lögfræði telur líklegt að hann muni þurfa að afplána refsingu sína í fangelsi frekar en að hann muni aðeins þurfa að greiða sekt. Hvort dómurinn verði skilorðsbundinn eða ekki fari eftir því hversu hátt hlutfall barnaníðsefnisins falli í flokk 3 en eins og kom fram að ofan var hluti efnisins í þeim flokki.

Á þingi í nítján ár

Larsen hefur ekki verið í gæsluvarðhaldi vegna málsins og er það vegna þess að hámarksrefsing fyrir glæpina nær ekki að uppfylla þau skilyrði sem þarf fyrir gæsluvarðhaldi. Samkvæmt dönskum lögum þarf refsingin að geta numið einu og hálfu ári í fangelsi.

Henrik Sass Larsen var viðskiptaráðherra fyrir Sósíaldemókrata frá ágúst 2013 til júní 2015. Hann var þingmaður á danska þinginu frá 2000 til 2019. Til umræðu kom að skipa hann fjármálaráðherra árið 2011 en vegna tengsla hans við Bandidos-rokkara kom ekki til þess. Fram kemur í frétt DR að hann hafi síðar orðið viðskiptaráðherra og svo sagt skilið við stjórnmál 2019. Áður en það gerðist var hann í veikindaleyfi og veikur af þunglyndi.

Árið 2019 tók hann við sem framkvæmdastjóri Aktive Ejere en í gær tilkynnti fyrirtækið að hann hefði sagt upp.