Ó­vænt lausn á erfið­leikum Martins? „Væri á sama tíma al­veg galið“

Í viðtali í setti hjá RÚV eftir sigurinn frækna gegn Tyrkjum á sunnu­daginn síðastliðinn, sem tryggði Ís­landi sæti á EM í sumar, sagði Martin frá því hvernig hann hefði allt í einu ekki fundið fyrir meiðslum í hásin sem höfðu verið að plaga hann vikurnar fyrir lands­liðs­verk­efnið og taldi hann að lausnin gæti falist í því að hafa skipt um þá skó sem hann spilar í.

Þannig er mál með vexti að hjá félagsliði sínu Alba Berlin í Þýska­landi er Martin skyldugur til þess að spila í Adidas skóm sökum styrktar samnings fyrir­tækisins við félagið. 

Staðan hins vegar gjör­breytist þegar að Martin spilar með lands­liðinu þar sem að hann getur spilað í Nike skóm sökum persónu­legs styrktar samnings síns við það fyrir­tæki.

„Það er ekkert leyndar­mál. Ég hef verið í þvílíku veseni síðustu tvo til þrjá mánuði með hásinina,“ segir Martin í sam­tali við íþrótta­deild. „Búinn að fara í enda­laust af sprautum, mynda­tökur, hitta sér­fræðinga og það gat enginn út­skýrt af hverju þetta var að gerast. Þetta var bara einn punktur á hásininni, því hásinin sjálf var í frábærum málum. Bara ein­hver vökvi sem var að safnast saman þarna á einum stað og enginn skildi af hverju.

Fyrir svona tveimur vikum síðan skipti ég um skó, hef verið í Nike skónum mínum í þessu lands­liðs­verk­efni og ekki fundið fyrir neinu. Vonandi er þetta bara út­skýringin en væri á sama tíma alveg galið. Að vera búinn að spila í þrjá mánuði að drepast en hefði bara þurft að skipta um skó. Reglan er þannig að ég þarf að spila í Adidas skóm með félagsliði mínu þar sem að liðið er með styrktar samning við Adidas. Samningurinn er þannig að ég hef ekkert val. En Nike-ið mitt, ég myndi ekki skipta því út fyrir neitt annað. Nike gerir krafta­verk.“

Það verður áhuga­vert að fylgjast með fram­haldinu hjá Martin úti í Þýska­landi með Alba Berlin í Adidas skónum og hvort að hann fari að finna til í hásininni aftur. Næsti leikur liðsins er í Euro­leagu­e á föstu­daginn næst­komandi.