Djúp lægð beinir ill­viðri til landsins

Þetta kemur fram í hugleiðingum veðurfræðings á vef Veðurstofunnar. Um spánna í dag segir að nú í morgun verði sunnan 18-28 metrar á sekúndu með vætusömu og hlýju veðri. Einna hvassast verði norðvestanlands.

Veðurviðvaranir eru í gildi víða um land. Fram að hádegi er appelsínugul viðvörun á öllum Vestfjörðum, Norðvesturlandi, Suðurlandi og óbyggðum. Þá er gul viðvörun á Austurlandi og Norðausturlandi.

Eftir hádegir dregur úr vindi og úrkomu, með sunnan 10-18 metrum á sekúndu, skúrum eða éli, Um landið norðaustanvert verði yfirleitt þurrt og síðan kólnar svo í veðri. Þegar lægðin gengur yfir landið í kvöld bætir í vind um tíma.

Mun rólegra veðri er spáð á morgun en þá er útlit fyrir sunnan og suðaustan golu eða kalda og él, en úrkomulítið norðanlands. Hiti um eða undir frostmarki. Annað kvöld nálgast næsta lægð með vaxandi austanátt og úrkomu í flestum landshlutum.

Veðurhorfur á landinu næstu daga

Á sunnudag: Suðaustan og sunnan 5-13 m/s og él, en úrkomulítið norðanlands. Hiti um eða undir frostmarki. Vaxandi austanátt um kvöldið með snjókomu eða rigningu sunnan- og austantil. 

Á mánudag: Gengur í sunnan og suðvestan 15-25, hvassast vestantil. Víða rigning eða slydda um morguninn og hiti núll til sex stig. Kólnar síðan með snjókomu eða éljum, en styttir upp um landið norðaustanvert. 

Á þriðjudag: Suðvestan 15-23 og snjókoma eða él, en úrkomulítið norðaustanlands. Víða vægt frost.

Á miðvikudag: Ákveðin suðvestanátt og él. Hlýnar eftir hádegi með rigningu eða slyddu, en snjókomu um tíma norðanlands.

Á fimmtudag: Hlý sunnanátt og rigning, en kaldara og slydda eða snjókoma á Norðvestur- og Vesturlandi.

Á föstudag: Suðvestanátt og él, en úrkomulítið austanlands. Svalt í veðri.