Tjáði sig um of­beldi sonarins fyrir and­látið: „Ætla aldrei að leyfa honum að koma ná­lægt mér aftur“

Lögreglunni á höfuðborgarsvæðinu barst tilkynning um miðnætti 13. október og héldu viðbragðsaðilar strax á vettvang, að fjölbýlishúsi í Breiðholti. Endurlífgunartilraunir hófust um leið og komið var á vettvang en þær báru ekki árangur og konan var úrskurðuð látin.

Sonur hennar var handtekinn og vettvangi. Hann hafði þá nýlega lokið afplánun, en líkt og áður segir hefur hann nú verið ákærður fyrir málið.

Áður hefur verið greint frá fyrri ofbeldismálum sonarins, þar sem hann réðst á foreldra sína. Árið 2006 stakk hann föður sinn í bakið en var sýknaður í því máli vegna ósakhæfis. Þá komst Héraðsdómur Reykjavíkur að þeirri niðurstöðu að hann hefði verið alls ófær um að stjórn gjörðum sínum. Honum var gert að sæta öryggisgæslu á viðeigandi stofnun.

Það var síðan árið 2022 sem maðurinn hlaut tveggja ára fangelsisdóm í Héraðsdómi Reykjavíkur fyrir að ráðast gegn móður sinni. var hann einnig sakfelldur fyrir kynferðisbrot gegn unglingsstúlku, og brot gegn valdstjórninni.

Hann var ákærður fyrir tilraun til manndráps fyrir árásina gegn móðurinni, en dómurinn heimfærði brotið sem stórfellda líkamsárás. Árásin varð á heimili móðurinnar í apríl 2022 skömmu eftir andlát föður mannsins, eiginmanns konunnar. Hann var ósáttur með að faðir hans myndi fá bálför og réðst því á móður sína.

„Eitt högg í viðbót og búmm, ég hefði dáið“

„Þetta er það erfiðasta sem ég hef upplifað,“ sagði konan í viðtali við Fréttablaðið skömmu eftir að dómur féll í málinu.

Syninum var gefið að sök að slá móður sína ítrekað með krepptum hnefum í líkama, andlit og höfuð, sparka í hana og taka hana ítrekað hálstaki þannig að hún missti meðvitund. Þá var hann jafnframt ákærður fyrir að hóta henni ítrekað lífláti.

„Eitt högg í viðbót og búmm, ég hefði dáið,“ sagði konan í viðtalinu.

Hún taldi að hún væri við dauðans dyr þegar hún sagði syninum að þau skyldu ekki halda bálför.

„Ég ætla aldrei að leyfa honum að koma nálægt mér aftur,“ sagði hún. „Það eru allir hræddir við hann. Það eru allir í blokkinni hræddir við hann. Ég er drulluhrædd við hann.“

Konan sagði að þegar lögreglu og sérsveit hefði borið að garði hefði hún spurt lögreglumennina hvort þeir væru með byssu og þeir svarað játandi. „Ég bað þá um að skjóta hann, son minn“ sagði hún og tók fram að lögreglumennirnir hefðu skilið þá afstöðu hennar.