Ekki púað á Snorra

Um er að ræða framgöngu á herrakvöldi á Selfossi þar sem Snorri Másson frambjóðandi var annar ræðumanna. Hinn var Stefán Einar Stefánsson fjölmiðlamaður og kampavínsinnflytjandi. En tónlistina annaðist Ingó veðurguð. Í frásögn Mannlífs kemur fram að Snorri hafi hrökklast af sviðinu við illan leik.

„Óánægja með boðskap ræðumannsins magnaðist og Snorri gafst upp á að halda áfram með ræðu sína og steig af sviðinu. Hávært klapp og fögnuður gaf til kynna að viðstaddir söknuðu hans ekki. Margir telja kvöldið hafa verið eftirminnilegt en að uppákoman hafi ekki aukið vinsældir Miðflokksins …“ segir Mannlíf.

Ekki segja Reyni af herrakvöldi á Selfossi

Hvað er satt og hvað er logið í þessari einkennilegu frásögn? Vísir grófst fyrir um það og byrjaði á heimildarmanninum sem óvart var upplýst um í upprunalegu útgáfunni. Karen Kjartansdóttir ráðgjafi, sem nú um stundir starfar fyrir Framsóknarflokkinn. Í skjáskoti sem gengur manna á millum, af fréttinni eins og hún birtist í fyrstu, kemur fram að Reynir vann fréttina upp úr skilaboðasendingum þeirra á milli. Skilaboðin birtust neðan við fréttina, copy-paste mistök ef svo má segja.

„Aldrei segja Reyni Traustasyni af Herrakvöldi Selfoss, hann mun afrita nafn heimildarmannsins og greina þannig fá því sem hann segir,“ segir Karen í samtali við Vísi. Hún veit ekki hvort hún á að hlæja eða gráta. Aðallega hlæja þó.

Karen segir að Reynir hafi haft samband við sig, því hann hafi heyrt þetta úr öðrum áttum og spurt sig út í þetta herrakvöld. En hún hafi vissulega ekki sjálf verið á því en heyrði í mörgum sem voru á téðu Herrakvöldi. Og sá dómur hafi fallið þar, meðal annars í vöfflukaffi hjá Framsóknarmönnum þar sem menn gerast sýslumannslegir, að þetta hafi verið erfitt hjá frambjóðandanum. Það hafi þetta verið altalað.

Erfir ekki særindi Framsóknarmanna

En hvað segir Snorri sjálfur?

„Já, ertu að tala um Framsóknarfréttina. Frétt Karenar Kjartansdóttur?“ spyr Snorri sem var á leið í klippingu þegar Vísir náði í skottið á honum. Varstu púaður af sviðinu?

„Hahaha, nei, alls ekki,” segir Snorri. Hann segir að allir sem þarna hafi verið geti vitnað um það. Snorri segir þetta reyndar hafa verið einkar ánægjulega stund.

„Ég hafði mikla ánægju af herrakvöldinu á föstudaginn og erfi það ekki við Framsóknarmenn að verða sárir yfir málflutningi mínum.“

Snorri telur að þetta hafi kannski fallið í grýttan jarðveg hjá einum Framsóknarmanni en það hafi verið viðbúið.

Mælir með Snorra sem ræðumanni

Hvað er satt og hverju er logið í þessu dularfulla máli? Í raun verður að kveða til dómara og hann er Tómas Þóroddsson veitingamaður, sem er einn þeirra sem stóð fyrir kvöldinu.

„Nei. Það var ekki púað. Það voru einhver frammíköll: „Þetta á ekki að vera stjórnmálafundur!“ Og: „Þetta er ekki stjórnmálafundur, hættu þessari pólitík.“ En það var lágt,“ segir Tómas.

En var hann púaður af sviðinu?

„Neinei, hann kláraði ræðuna sína. Ég veit auðvitað ekkert um það hvort hann stytti ræðuna. En hann var að tala um steggjunina sína, að þar hafi hann kynnst Sigmundi Davíð og af hverju hann fór út í þetta. Þetta var enginn áróður, alls ekki. Mér fannst hann komast vel frá þessu.“

Og þú mælir með honum sem ræðumanni?

„Já, klárlega, ég mæli með honum á herrakvöld. Og, ég held að Karen hafi ekki verið þarna. Enda, herrakvöld,“ segir Tómas.

Og þar höfum við það.