„Með því al­var­legra sem ég hef séð frá Vinnu­eftir­litinu“

Vinnueftirlitið hefur lokið rannsókn á banaslysi sem varð í Grindavík í janúar þegar Lúðvík Pétursson féll ofan í sprungu þegar hann vann þar við íbúðarhús. Þriggja daga leit að honum skilaði engu.

Tjá sig ekki um málið

Í skýrslunni kemur fram að EFLA verkfræðistofa hafi haft umsjón með verkinu að beiðni Náttúruhamfaratryggingar Íslands (NTÍ). Þá hafi verktakafyrirtæki starfað að verkinu. Fréttastofa óskaði eftir viðbrögðum frá Eflu í dag sem ætlar ekki tjá sig um málið að sinni. Þá kom fram í svari NTÍ við sömu fyrirspurn fréttastofu að niðurstöður í skýrslu eftirlitsins beinist ekki að verklagi eða störfum NTÍ. Stofnunin muni engu að síður fara vel yfir skýrsluna og þau sjónarmið sem þar koma fram. Að öðru leyti hyggst stofnunin ekki tjá sig frekar um málið.

Viljum koma í veg fyrir að þetta komi fyrir aftur

Fjölskylda Lúðvíks kallaði eftir því fljótlega eftir slysið að fram færi rannsókn óháðra aðila að hvarfinu.

Elías Pétursson bróðir hans, sem hefur víðtæka reynslu af sveitarstjórnarmálum og verktakastarfsemi, segir niðurstöður og Vinnueftirlitsins sýna enn frekar nauðsyn þess. Fjölskyldan leggi áherslu á að það þurfi að læra af þessu máli.

„Ég tel að skýrslan sé með því alvarlegra sem ég hef séð frá Vinnueftirlitinu. Augljóslega erum við fjölskyldan sammála um að þarna hafi menn tekið áhættu sem var ekki þess virði. Það kemur fram í skýrslunni að menn hafi ekki unnið áhættumat sem er að merkilegt því verkefnið var ekki með neinum hætti viðkvæmt tímalega séð. Menn þurftu ekki að æða í það. Ég tel að með þessari niðurstöðu séu engin rök fyrir öðru en að dómsmálaráðherra ákveði  að setja á stofn óháða nefnd sem fari yfir alla þætti málsins. Þar verði aðdragandinn, slysið og eftirleikurinn rannsakað með það að markmiði að hægt sé að læra af því sem fór úrskeiðis. Til að koma í veg fyrir slík slys gerist aftur,“ segir Elías. 

Engin viðbrögð hafi enn komið borist frá dómsmálaráðherra.

„Það hefur ekkert gerst. Það hefur verið þessi rannsókn Vinnueftirlitsins. Það hefur verið rannsókn lögreglu þar sem lögregla er að einhverju leyti að rannsaka sjálfan sig,“ segir hann.

Vilja að leit haldi áfram

Þá sé gríðarlega mikilvægt að áfram verði leitað af Lúðvík.

„Fjölskyldan hefur líka óskað eftir því að það verði áfram leitað af líkamsleifum Lúðvíks. Ég hef ágætar vonir um að það verði gert, mér finnst skilningur á því. Það væri ákveðin lúkning á þessu málið að finna hann og geta jarðsett. Þess vegna er það mikilvægt,“ segir hann. 

Elías segir marga eiga um sárt að binda eftir fráfall Lúðvíks.

Þetta hefur verið erfiður tími, erfiðastur fyrir börnin hans. Þetta er mikill missir fyrir marga. Við sjáum líka hvaða áhrif þetta hefur haft á Grindavík og hvaða áhrif slysið hafði á sínum tíma á allt og alla. Það eru ekki bara við sem eigum um sárt að binda það eru miklu fleiri.