Í tilkynningu Símans til Kauphallar segir að breytingarnar séu hluti af framtíðarsýn félagsins og endurspegli fyrst og fremst aukna áherslu á sölu, markaðssetningu og upplifun viðskiptavina.
Vésteinn Gauti leiðir auglýsingamiðlun
Í tilkynningu segir að annað nýju sviðanna sé auglýsingamiðlun, sem sé nýtt tekjusvið þar sem auglýsingalausnir Símans og dótturfélagsins Billboard muni saman þróa og festa í sessi nútímalegar auglýsingalausnir ásamt frekari nýsköpun þar sem gögn og gervigreind spili stórt hlutverk.
Vésteinn Gauti Hauksson sé nýr framkvæmdastjóri auglýsingamiðlunar en hann komi til Símans frá Billboard.
Áður hafi Vésteinn starfað sem forstöðumaður auglýsingasölu og markaðsrannsókna hjá Símanum á árunum 2013 til 2016. Vésteinn hafi áratugareynslu af auglýsingasölu og rekstri í heimi fjölmiðla.
Sjónvarpsefni og markaðsmál í eina sæng
Miðlar sé nýtt svið þar sem sjónvarpsefni og markaðsmál sameinist undir stjórn Birkis Ágústssonar, sem taki sæti í framkvæmdastjórn. Sviðið muni stýra framleiðslu á innlendu sjónvarpsefni, innkaupum á erlendu sjónvarpsefni ásamt því að stýra ásýnd vörumerkis Símans.
Nýtt svið muni styrkja Sjónvarp Símans Premium og hefja markaðslega sókn Símans á einstaklings- og fyrirtækjamarkaði ásamt því að efla sjónvarpsþjónustu Símans í heild sinni fram á við.
Birkir hafi leitt innlenda dagskrárgerð hjá Símanum undanfarin ár við góðan orðstír, en starfað áður sem markaðsstjóri Storytel á Íslandi. Áður hafi Birkir verið markaðssérfræðingur hjá Símanum og 365 miðlum þar sem hann leiddi markaðs- og kynningarstarf sjónvarps.
Fjármálasvið tekur yfir sjálfbærnimálin
Þá segir í tilkynningu að sviðið sjálfbærni og menning hafi verið lagt niður sjálfbærnimál færist til fjármálasviðs en verði áfram unnin þvert á félagið. Flokkunarreglugerð ESB og reglugerð um sjálfbærniupplýsingagjöf kalli á stórauknar mælingar og upplýsingagjöf, sem fjármálasvið muni leiða.
Við þessar breytingar muni Erla Ósk Ásgeirsdóttir láta af störfum hjá Símanum.
„Ég geng stolt frá borði. Þetta hafa verið viðburðarrík ár hjá Símanum. Við höfum áorkað miklu saman sem við getum öll verið stolt af og ég óska starfsfólki Símans alls hins besta í framtíðinni enda einstakur mannauður sem starfar hjá Símanum,“ er haft eftir henni.
Rökrétt framhald
Haft er eftir Maríu Björk Einarsdóttur, forstjóra Símans, að breytingarnar séu rökrétt framhald af þeirri þróun fyrirtækisins að leggja aukna áherslu á vöruþróun og þjónustuupplifun.
„Ég vil þakka Erlu Ósk Ásgeirsdóttur kærlega fyrir hennar framlag til fyrirtækisins á síðustu árum. Erla hefur leitt stór verkefni innan Símans með góðum árangri, þar með talið endurmörkun vörumerksins, stefnumótunarvinnu og innleiðingu sjálfbærnistjórnkerfis. Við óskum henni velfarnaðar á nýjum vettvangi.“
