Í fréttatilkynningu frá félaginu segir að Þóra hafi víðtæka reynslu af þjónustu við fólk á vinnumarkaði og hafi sérhæft sig í að starfa með einstaklingum sem glíma við streitu og kulnun.
Hún sé sérfræðingur í réttindamálum á vinnumarkaði og hafi unnið að einstaklingsbundinni ráðgjöf þar sem gerðar séu markvissar áætlanir varðandi endurhæfingu ásamt samvinnu við fagaðila.
„Stéttarfélög eru oft fyrsti viðkomustaður fólks í vanda á vinnumarkaði. Í samræmi við þjónustumarkmið Visku er mikilvægt að grípa fólk snemma og leiðbeina í réttu úrræðin. Þá geta samskipti við atvinnurekendur og tengsl við fagaðila skipt sköpum. Það er sannarlega mikill fengur fyrir Visku að fá þá miklu reynslu og þekkingu sem fylgir Þóru til okkar,“ er haft eftir Georg Brynjarssyni framkvæmdastjóra Visku.
Þóra hefur í ellefu ár starfað sem ráðgjafi fyrir háskólamenntað fólk hjá VIRK – starfsendurhæfingu, lengst af innan BHM. Þar áður starfaði hún sem félagsráðgjafi hjá Reykjavíkurborg, að því er kemur fram í tilkynningunni.