Í uppfærðri loftslagsaðgerðaáætlun ríkisstjórnarinnar var aðgerðum fjölgað úr 48 í 150. Ein þeirra er það að skoða að flýta því að óheimilt yrði að nýskrá bensín- og dísilbíla um tvö ár. Það myndi þá gerast í byrjun árs 2028 í stað 2030.
Runólfur Ólafsson, framkvæmdastjóri Félags íslenskra bifreiðaeigenda, segir þetta afar óraunhæft.
„Þetta er í rauninni óframkvæmanlegt og kannski er þetta einhver óskhyggja. Þetta lítur kannski vel út á blaði en það hefur greinilega ekki verið talað við þá sem að þessum málum koma, til dæmis bílgreinina. Þannig það vantar kannski raunverulegar áætlanir á bak við þetta,“ segir Runólfur.
Nýskráðum rafbílum fækkar
Árið 2023 voru rafbílar 42 prósent allra nýskráðra bíla hér á landi, tæplega ellefu þúsund talsins. 22 prósent bíla voru dísilbílar og 16 prósent bensínbílar.
Á fyrstu sex mánuðum 2024 hefur salan á rafbílum dregist verulega saman og voru einungis þrettán prósent nýskráðra bíla rafbílar. Nýskráðum dísilbílum fjölgar og tróna nú á toppnum með 34 prósent og bensínbílarnir eru 26 prósent af þeim nýskráðu.
355 þúsund bílar eru á skrá á landinu, 41 prósent bensínbílar, 39 prósent dísilbílar og einungis 8,4 prósent rafmagnsbílar.
Brotthvarf ívilnana hafi áhrif
Runólfur telur afnám ýmsa ívilnana síðustu áramót við kaup á rafbílum hafa haft slæm áhrif.
„Með því að lækka það sem ríkið lagði til með kaupum á rafbílum, leggja á nýtt fimm prósent vörugjald á rafbíla og á sama tíma kom nýtt kílómetragjald á rafbíla og tengiltvinnbíla upp á sex krónur á kílómetrann. Þetta var bara of mikið í einu, þetta greinilega fældi fólk frá sem og tölurnar sýna,“ segir Runólfur.
Grípa þurfi til aðgerða til að fjölga rafbílum hér á landi.
„Eins og staðan er núna, þá eru rafbílar það dýrari að hvatinn er ekki lengur til staðar. Núverandi aðgerðir eru ekki að duga. Ég held að menn hafi bara gengið of langt,“ segir Runólfur.
