Skaga­menn stigalausir á móti Blikum í meira en fimm ár

Leikur Breiðabliks og ÍA hefst klukkan 19.15 og verður sýndur beint á Stöð 2 Sport.

Breiðablik hefur unnið alla deildarleiki félaganna undanfarin fimm ár eða alls sex leiki í röð með markatölunni 20-9.

Liðin mættust tvisvar sumarið 2022 en þá unnu Blikar báða leikina og skoruðu í þeim samtals átta mörk. Markahæstur Blika í leikjunum tveimur var Ísak Snær Þorvaldsson með þrjú mörk.

Skagamenn hafa ekki náð í stig út úr leik á móti Blikum síðan 19. maí 2019. Þá vann ÍA 1-0 sigur á Breiðabliki á Kópavogsvellinum. Sigurmarkið í leiknum skoraði Einar Logi Einarsson í uppbótatíma.

Tveir af síðustu þremur sigurleikjum Skagamanna á Blikum hafa einmitt komið í Kópavoginum því liðið vann einnig 1-0 sigur á Kópavogsvellinum 11. júlí 2016. Reyndar hafa síðustu fjórir sigurleikir Skagamanna á móti þeim grænu endað 1-0.