Hafa engin varnar­virki til að hörfa í

Skortur á skotfærum fyrir stórskotalið og mannekla hefur komið niður á vörnum Úkraínumanna að undanförnu. Vonast er til þess að ástandið skáni á næstunni vegna hergagnasendinga frá Bandaríkjunum.

Þegar Rússar sækja fram og finna skotgrafir Úkraínumanna, varpa þeir allt að 1,5 tonna sprengjur sem búnar eru svifvængjum og staðsetningarbúnaði til að á úkraínsku hermennina. Sprengjunum er varpað hátt á lofti, langt frá víglínunni og utan færis loftvarnarkerfa Úkraínumanna.

Þegar sprengjurnar lenda valda þær gífurlegum skemmdum og skilja eftir sig stærðarinnar gíga. Sterk varnarvirki eru því mikilvæg fyrir úkraínska hermenn.

Vólódímír Selenskí, forseti Úkraínu, sagði frá því í morgun að í apríl hefðu Rússar varpað rúmlega 3.200 sprengjum af þessu tagi á Úkraínu. Kallaði hann eftir fleiri og betri loftvarnarkerfum.

Þegar úkraínskir hermenn frá einu þorpi til annars er ekki búið að grafa skotgrafir eða byrgi þar sem þeir geta tekið upp varnir á nýjan leik. Í samtali við blaðamann AP fréttaveitunnar segja hermenn að þetta þurfi að bæta.

Hermenn þurfi að hafa varnarvirki til að hörfa til. Einn yfirmaður sem rætt var við sagði að auka þyrfti byggingu varnarvirkja en yfirvöld í Úkraínu hafa verið gagnrýnd vegna hægagangs þegar kemur að byggingu varnarvirkja. Þetta er talið hafa kostað marga úkraínska hermenn lífið.

Sjá einnig: Sirskí segir stöðuna hafa versnað tölu­vert

Yfirvöld í Úkraínu hafa sett töluverða fjármuni í að byggja umfangsmikil varnarvirki en hermenn á víglínunni segja að sú vinna hefði átt að byrja í fyrra. Ekki núna þegar verið er að berjast á svæðinu en stórskotaliðsárásir og sjálfsprengidrónar hafa komið niður á vinnunni og hafa verktakar fallið í árásum Rússa.

„Margir töldu okkur ekki þurfa að undirbúa varnarlínur. Þeir bjuggust ekki við nýrri sókn Rússa,“ sagði einn viðmælandi AP.

Víglínan í Úkraínu er rúmlega þúsund kílómetra löng en helstu átökin í Úkraínu þessa dagana eiga sér stað vestur af bæjunum Avdívka og Bakmút í austurhluta Úkraínu. Þar hafa Rússar sótt fram á undanförnum vikum.

Hér að neðan má sjá tvær hreyfimyndir frá hugveitunni Institute for the study of war, sem sýnir hvernig víglínan breyttist við báða bæina í síðasta mánuði.

Í einu tilfelli var 67. stórfylki úkraínska hersins sent til Chasvi Yar, sem er mjög mikilvægur bær vestur af Bakmút í Dónetskhéraði og eru Rússar að gera umfangsmikið áhlaup að honum. Hermönnum stórfylkisins var gert að taka upp varnir um þrjá kílómetra frá bænum.

Þegar þeir komu á víglínuna fundu þeir ekki skotgrafir eða annars konar varnarvirki, heldur grunnar holur sem hermenn höfðu notað til að reyna að skýla sér frá stórskotaliðsárásum Rússa.

Hermenn 67. stórfylkis þurftu að reyna að bæta varnarvirkin á meðan sprengjum rigndi yfir þá. Það gekk erfiðlega þar sem skotgrafir þeirra hrundu ítrekað þegar sprengjur lentu þar nærri. Að endingu hörfuðu hermennirnir tvo kílómetra til vesturs en einn heimildarmaður AP segir rúmlega hundrað hermenn hafa fallið eða þeir týndir. Þar á meðal margir yfirmenn stórfylkisins.

Stórfylkið var svo lagt niður í kjölfarið.

Hér að neðan má sjá nýlegt myndband af átökum í Dónetsk, þar sem úkraínsk áhöfn Bradley bryndreka grandaði rússneskum bryndreka af gerðinni MT-LB, eftir að sá hafði verið notaður til að flytja rússneska hermenn fram á við.