Þarf ekki í faðernispróf eftir að hafa blandað sæði sínu og föður síns

Þetta úrskurðaði áfrýjunardómstóll í London, en fjallað er um málið á vef Sky News.

Í úrskurðinum segir að miklar líkur séu á því að einstaklingurinn sem barnið telji vera afa sinn sé í raun og veru blóðfaðir þess. Og að sá sem barnið telji vera föður sinn sé í raun og veru hálfbróðir þess.

Fram kemur að maðurinn og barnsmóðir hans hafi samþykkt að blanda saman sæði hans við föður hans og notast við það til að gera konuna ólétta. Það hafi þau gert vegna þess að maðurinn hafi glímt við frjósemisvanda, og þau ekki átt efni á tæknifrjóvgun.

Þetta leiddi til fæðingar sveinbarns, en ákvörðunin átti að vera leynileg.

Dómari málsins segir í úrskurðinum að drengurinn sé „einstakt barn sem væri ekki til ef ekki væri fyrir óvenjulega tilhögun mála við getnaðinn, en þessi tilhögun hefur jafnframt skapað möguleika á því að barnið gæti orðið fyrir andlegum skaða komist það að sannleikanum.“

Barnið og maðurinn hefðu myndað með sér náin fjölskyldutengsl, sem feðgar. Það væri undir manninum og móðurinni að ákveða hvort barnið ætti að verða upplýst um hið sanna.

„Það er þeirra mál,“ segir dómarinn.