Fóst­bræður innan um „við­bjóðs­legt og ofbeldisfullt efni“

Aðalmeðferð í málinu hófst í síðustu viku og heldur áfram í dómssal 101 við Lækjartorg í þessari viku.

Umfangsmikla leit þurfti að gera á tölvum Sindra Snæs að sögn lögreglumanns sem hafði það hlutverk að kanna þær. Hann sagði að rauði þráðurinn í netnotkun Sindra væri efni sem varðaði vopn, lögreglufatnað, skjöl sem vörðuðu hægri-öfgahyggju. Þó væri vissulega að finna „eðlilegra“ efni.

Á meðal gagna málsins vöru gögn sem sýndu netleit Sindra Snæs. Lögreglumaðurinn benti á að þarna væri efni sem varðaði skotárás í Christchurch í Nýja-Sjálandi, en á tölvu Sindra var að finna myndband af árásinni sem árásarmaðurinn tók sjálfur. Þá hafði Sindri heimsótt síðu sem lögreglumaðurinn sagði að innihéldi „viðbjóðslegt og ofbeldisfullt efni“.

Jafnframt mátti sjá að vefslóð með yfirskrift um „stríð hvíta mannsins“ og aðra þar sem að sagði að „hatursglæpir væru fyrir hvítt fólk, og að n***** mættu gera það sem þeir vildu.“

Sveinn Andri Sveinsson, verjandi Sindra, benti á að þarna væri ýmislegt annað efni, og benti á Fóstbræðramyndbönd. Á lista yfir netleit Sindra mátti sjá lagið Þriðjudagskvöld úr sjónvarpsþáttunum Fóstbræðrum. 

Einnig benti Sveinn Andri á að þessi vöfrun næði yfir skamman tíma, svo virtist sem hann hafi ekki stoppað lengi við hverja vefsíðu.

Mikið af limlestingarmyndböndum

Annar lögreglumaður sem kannaði innihald úr tækjum Ísidórs sagði að í þeim hafi verið að finna mikið af öfgafullu efni. Hann nefndi sem dæmi að einhver þeirra hafi varðað nasisma og fullyrðingar um að helför þeirra hafi ekki átt sér stað.

Þá sagðist hann einnig hafa séð „óhugnanleg myndbönd“ sem sýndu aflimanir á fólki. „Þetta voru mjög ljót myndbönd og það var mikið af þeim.“

Einnig sagði lögreglumaðurinn að Ísidór hafi skoðað efni sem varðaði gyðinga, barnaníðinga og samkynhneigð.

Köttur Ísidórs til umræðu

Sérfræðingur á vegum héraðssaksóknara gaf einnig skýrslu fyrir dómi, en hún hafði fengið það verk að rýna í gögn á tækjum sakborninganna og samskipti þeirra.

Hún benti á að í tækjum þeirra væri að finna stefnuyfirlýsingu hryðjuverkamannsins Anders Behring Breivik. Einnig að Sindri og Ísidór hafi vísað í hana í samskiptum sín á milli.

Í kjölfar einnar tilvísunar í Breivik í samskiptum sakborninganna sagði annar þeirra að „Þorvaldur væri tilbúinn að maka því á alla hurðarhúna í Reykjavík.“

Sérfræðingur héraðssaksóknara benti á að við rannsókn málsins hefði komið í ljós að Þorvaldur væri köttur Ísidórs. Sveinn Andri setti út á að það kæmi ekki fram í skýrslu sérfræðingsins, sem viðurkenndi að svo hefði mátt vera.

„Fannst þér samskiptin alvöruþrungin?“

Þá var vísað til þess að Breivik hafi klætt sig upp sem lögreglumann, og verið með lögregluskírteini, þegar hann framdi hryðjuverk í Útey árið 2011, og í stefnuyfirlýsingu sinni hafi hann hvatt aðra hryðjuverkamenn til að gera slíkt hið sama. 

Bent var á að í síma Sindra væri að finna ljósmynd af íslensku lögregluskírteini, og í skýrslu lögreglu var það sett í samhengi við Breivik.

„Er ekki langt gengið að setja hana í samhengi við Breivik?“ spurði Sveinn Andri, sem benti á að myndin hefði verið tveggja ára gömul þegar sakborningarnir voru handteknir. Sérfræðingurinn sagði að sér hefði þótt viðeigandi að setja myndina í samhengi við Breivik í skýrslunni, en að það væri ekki sitt að meta hvort það hefði endanlega þýðingu.

„Fannst þér samskiptin alvöruþrungin?“ spurði Sveinn Andri og minntist sérstaklega á samskipti Sindra og Ísidórs þar sem þeir töluðu um fá sér tilvísun úr samskiptum þeirra húðflúraða á sig „eins og skvísurnar á insta“ og vísaði þar með til samfélagsmiðilsins Instagram.

„Ef ég á að vera alveg heiðarleg þá er erfitt að meta það,“ svaraði sérfræðingurinn sem bætti við að það væri þó ekki sitt að meta.