Fékk þrjá­tíu mínútna sögu­kennslu í tveggja tíma við­tali

Þegar Carlson, sem er nú sjálfsætt starfandi eftir að hafa verið látinn fjúka frá Fox News, tókst loksins að beina talinu að nútímanum ásakaði Pútín Bandaríkin og önnur Vesturlönd um að bera ábyrgð á því að átökin í Úkraínu hefðu dregist á langinn.

Forsetinn sagði friðarviðræður hafa verið í gangi sem hefðu verið nærri því að skila niðurstöðu, þegar Úkraína hefði ákveðið að ganga frá samningaborðinu og fara að fyrirmælum vestrænna ríkja, Evrópuríkja og Bandaríkjanna um að berjast við Rússa þar til yfir lyki.

Sjá einnig: Við­ræðurnar snerust um upp­gjöf, ekki frið

Pútín beindi spjótum sínum aðallega að Boris Johnson, fyrrverandi forsætisráðherra Bretlands, í þessu samhengi og sagði hann hafa talað um fyrir Vólódímír Selenskí Úkraínuforseta, þegar síðarnefndi var við það að undirrita friðarsamkomulag skömmu eftir að „hinar sérstöku hernaðaraðgerðir“ Rússa hófust.

Stjórnvöld í Rússlandi sögðu síðast í desember að það væri óraunhæft að ganga til friðarviðræðna við Úkraínu en Úkraínumenn hafa ítrekað lýst því yfir að þeir muni ekki semja um frið fyrr en Rússar hafa alfarið hörfað úr landinu.

„Nytsamlegur sakleysingi“

Pútín sagði hins vegar við Carlson að Rússar og Bandaríkjamenn ættu reglulega í samskiptum í gegnum ýsmar boðleiðir um leiðir til að binda enda á átökin. Skilaboð hans til Bandaríkjamanna væru að hætta að sjá Úkraínumönnum fyrir vopnum; þannig væri hægt að ljúka málum á nokkrum vikum.

Forsetinn sagðist sjálfur hafa rætt síðast við Biden áður en innrásin hófst og að skilaboð hans til Bandaríkjaforseta hefðu verið að hann væri að gera söguleg mistök með því að styðja Úkraínumenn í að „ýta Rússlandi burt“.

Viðtalsins hefur verið beðið með nokkurri eftirvæntingu en Hillary Clinton, fyrrverandi utanríkisráðherra Bandaríkjanna, sagði á miðvikudag að Carlson væri „nytsamlegur sakleysingi“ fyrir Pútín að nota. Carlson væri lygari.

„Hann étur upp lygar Vladimir Pútín um Úkraínu, þannig að ég skil að Pútín veiti honum viðtal; í gegnum hann getur hann haldið áfram að ljúga um markmið sín í Úkraínu og hvað hann á von á að gerist,“ sagði Clinton í samtali við MSNBC.

Sjá einnig: Segir barist fyrir til­vist Rúss­lands

Carlson er fyrsti fjölmiðlamaðurinn á Vesturlöndum sem fær áheyrn hjá Rússlandsforseta frá því að innrásin í Úkraínu hófst en sjálfur hefur hann haldið því fram að hann sé jafnframt sá eini sem hafi reynt. 

Þetta er þó alrangt, þar sem miðlar á borð við BBC og CNN hafa ítrekað freistað þess að fá að setjast niður með forsetanum. Þetta hefur verið staðfest af yfirvöldum í Kreml.

Hér má finna ítarlega frétt Guardian um málið.