Hægt að for­rita og prófa kappakstursbíla á UT-messunni í dag

„Við höfum verið með UT-messuna í fjórtán ár og það er helsti tilgangurinn að vekja athygli á því hversu ótrúlega fjölbreyttur hann er þessi tækni og tölvugeiri. Hann er kominn út um allt og framtíðin er þannig að það þú þarft ekkert að vera forrita. Það vilja allir reyna að skilja tæknina,“ segir Arnheiður Guðmundsdóttir framkvæmdastjóri UT-messunnar.

Tæknidagur ráðstefnunnar fer fram í dag þar sem hægt er að sjá og prófa ýmsar tækninýjungar á vegum bæði Háskóla Íslands og Háskólans í Reykjavík.

„Fólk getur átt hérna skemmtilegan dag með fjölskyldunni. Við erum með dagskrá fyrir alla aldurshópa og erum búin að dreifa þessu um allt húsið þannig það á að fara vel um alla,“ segir Arnheiður og að dagskráin sé afar fjölbreytt.

„Klukkan eitt verðum við með erindi í Eldborg þar sem Jose Cordero, framtíðarspekingur, ætlar að taka spjall við Kára Stefánsson um það hvort að tæknin geti læknað dauðann,“ segir Arnheiður og að þótt svo að það sé viðburður sem miði frekar að eldra fólki sé nóg að skoða fyrir yngri kynslóðir. Dagskráin er hér.

Háskóli Íslands og Háskóli Reykjavíkur bjóði báðir fólki að sjá og prófa helstu tækninýjungar á þeirra vegum. Háskóli Íslands er í Silfurbergi og Háskólinn í Reykjavík í Norðurljósum.

„Þar er hægt að prófa allskonar tækninýjungar, prófa að forrita og sjá kappakstursbíla sem nemendur hafa verið að smíða,“ segir Arnheiður Guðmundsdóttir, framkvæmdastjóri UT messunnar. Tæknidagurinn er í Hörpu, er opinn öllum og er opinn til klukkan 16.

Gervigreind og öryggismál 

Ráðstefnan hófst um miðja vikuna. Arnheiður segir rauðan þráð í umræðum ráðstefnunnar í vikunni hafa verið gervigreind og öryggismál.

„Ég myndi segja að það sem var rauður þráður hér í gær var öryggismál og gervigreind, sýndarveruleiki, vinnsla gagna og allt það. Það sem við vitum að framtíðin verður. Það er svo mikið tengt þessari gervigreind,“ segir Arnheiður.

Hún segir að einnig hafi verið fjallað um mikilvægi íslenskunnar í tækninni en Miðeind hlaut Upplýsingatækniverðlaun Ský 2024 sem voru afhent við hátíðlega athöfn á ráðstefnu- og sýningardegi UT-messunnar í gær. Forseti Íslands, hr. Guðni Th. Jóhannesson afhenti Vilhjálmi Þorsteinsson, stofnanda Miðeindar og Lindu Heimisdóttur, framkvæmdastjóra Miðeindar, verðlaunin sem er glerlistaverk eftir Ingu Elínu.

„Framlag Miðeindar til að koma íslensku máli inn í framtíðina er ómetanlegt. Í kjölfar heimsóknar sendinefndar forseta Íslands til Kísildals í maí 2022 tók Miðeind upp samstarf við OpenAI um að styðja íslensku í risamállíkönum á borð við GPT-4, sem kom út í mars á síðasta ári. Afrakstur samstarfsins má meðal annars sjá í nýjustu útgáfu líkansins, GPT-4 Turbo, sem er mun sleipara í íslensku en fyrri líkön. Þá tekur Miðeind þátt í stóru Evrópuverkefni ásamt Háskóla Íslands, þar sem þróað verður risamállíkan fyrir íslensku og önnur germönsk tungumál,“ sagði meðal annars í umsögn dómnefndarinnar.