Félags- og vinnumarkaðsráðuneytið sagði í svörum til fréttastofu í gær að IOM væri meðvitað um leyfin og þeim hefði verið send aðstoðarbeiðni, en að ekki væri hægt að gera neitt fyrir fólkið fyrr en það getur vitjað leyfanna í Kaíró á Egyptalandi. Félags- og vinnumarkaðsráðuneytið er með samning við Alþjóðlegu fólksflutningastofnunina (IOM) um aðstoð vegna flóttafólks sem kemur til landsins í boði stjórnvalda og vegna fjölskyldusameininga. Mjög erfitt er að komast yfir landamærin frá Gasa í Palestínu.
Í svari utanríkisráðuneytis til fréttastofu um málið segir að utanríkisráðherra hafi ekki átt í beinum samskiptum við egypsk yfirvöld frá því að átök stigmögnuðust í upphafi októbermánaðar í Palestínu.
„Fulltrúar ráðuneytisins eru hins vegar í stöðugum samskiptum við yfirvöld á átakasvæðinu, þar á meðal í Egyptalandi. Þar hefur málflutningur Íslands verið skýr um að koma þurfi á vopnahléi á Gaza, tryggja tafarlausa lausn gísla Hamas, óheft aðgengi neyðaraðstoðar og fylgja alþjóðalögum án undantekninga.“
Ekki vænleg niðurstaða að íbúar Gasa þurfi að flýja
Þá segir enn fremur að íslenska ríkið hafi verið meðflutningsríki, ásamt Egyptalandi og fleiri ríkjum, í ályktunum þess efnis og að skýr samhljómur hafi verið á fundum ráðherra með stjórnvöldum annarra ríkja á svæðinu um að pólitíska lausn þurfi til að koma á varanlegum friði. Það sé ekki vænleg niðurstaða að íbúar Gaza þurfi að yfirgefa heimili sín varanlega, í stórum stíl.
„Hins vegar fylgist ráðuneytið áfram grannt með stöðu mála á landamærum Palestínu og Egyptalands, en þau eru í dag lokuð inn til Egyptalands og óljóst hvort eða hvenær dvalarleyfishöfum verður kleift að yfirgefa Gaza.“
Þá kemur fram í svari ráðuneytisins að Ísland starfræki hvorki sendiráð í Ísrael né Egyptalandi og að stjórnvöld njóti ekki aðstoðar Norðurlanda þegar um er að ræða aðra en íslenska ríkisborgara.
„Það er því örðugt að svara frekar til um aðgerðir í þessum efnum, en stjórnvöld fylgjast áfram með stöðu mála og meta möguleg viðbrögð og aðgerðir.“
Erfitt að börnin komist ekki út
Fjölskyldufaðir frá Palestínu sagði frá því í Kvöldfréttum Stöðvar 2 síðustu helgi að þrátt fyrir að fjölskylda hans hafi verið komin með dvalarleyfi á Íslandi fyrir um mánuði síðan séu þau enn föst á Gasa. Hann sagði erfitt að útskýra fyrir börnunum að þau séu með leyfi á Íslandi en ekki sé hægt að koma þeim út.
Tuttugu þúsund eru látin á Gasa vegna árása Ísraela að sögn heilbrigðisyfirvalda þar. Stór hluti þeirra eru konur og börn.
