Mjög sáttur við þessa tvennu og þá sér­stak­lega fyrri hálf­leikinn úti

„Ég er mjög sáttur með sigurinn og að komast áfram í 16-liða úrslitin sem verða í febrúar. Sigurinn úti var mjög góður, þar sýnum við breiddina hjá okkur þar sem það vantaði nokkra leikmenn. Við fengum einhverja inn í dag en ekki alla. Ég er mjög stoltur af breiddinni hjá okkur, Agnar Smári kemur með góð mörk fyrir okkur í dag. Þetta var bara mjög faglegur og góður sigur hjá okkur hér í dag en að mínu mati var það sigurinn út sem var frábær. Ég er mjög sáttur við þessa tvennu og þá sérstaklega fyrri hálfleikinn úti.“

Það er ansi hreint sterk tenging milli þessara liða. Roland Valur Eradze, fyrrverandi markvörður Vals, var aðstoðarþjálfari HC Motor í fyrra og gerði þá að meisturum meðal annars. Óskar segist aðeins hafa sent á Roland en bendir á að Roland hafi vissulega miklar tengingar við HC Motor líka.

„Ég senti aðeins á Roland en við vorum með myndefni og fleira af þeim. Ég spurði hann bara aðeins hvernig þetta hafi verið í fyrra hjá þeim en annars vildi ég ekkert vera að taka eitthvað svoleiðis. Við vorum með nóg myndefni og Roland hefur náttúrulega tengingar hingað en auðvitað líka til þeirra.“

Alexander Peterson hefur verið á láni í Katar undanfarinn mánuð. Hann var samt hvergi sjáanlegur í dag. Hver er staðan á Alexander?

„Hann er kominn en er bara veikur heima eins og er. Það var vitað mál þar sem þetta lán var í mánuð og svo ertu með ákveðna pappírsvinnu varðandi EHF þannig að það var eiginlega vitað að hann yrði ekki með í þessum leik. Lánið var 1. nóvember til 1. desember þannig að maður myndi halda að þetta myndi ganga en því miður var það ekki hægt. Þetta eru furðulegar EHF reglur sem ég nenni eiginlega ekki að fara í. Hann verður með í næsta leik gegn Víking og Magnús Óli verður frá í tvær til þrjá vikur í viðbót. Annars erum við nokkuð sprækir. Við vorum án Arons Dags úti líka og það var mjög gott að fá Róbert Aron inn. Hann var meiddur í læri og kom inn í leikinn úti og var stórkostlegur í vörninni.“

Spurður að því hversu mikill munur sé á Evrópudeildinni sem Valur keppti í fyrra og Áskorendabikarnum sem liðið sé núna í segir Óskar að munurinn sé talsverður. Hann bendir þó á að það sé fegurð yfir báðum keppnunum.

„Það er klárlega munur á þeim. Þú færð alveg hörku lið í þessari keppni eins og FTC sem voru með okkur í riðli í fyrra. Þegar líður á þá koma allskonar góð lið. Það er líka mikill munur á umgjörðinni milli keppna. Evrópudeildinn er náttúrulega svo stórt dæmi þar sem alltaf er spilað á þriðjudögum og á dúk á meðan hér ertu kominn í heima og heiman. Það er því allt miklu stærra og meira í Evrópudeildinni en hér er miklu meiri möguleiki á að fara lengra og á sama tíma geta liðin lent í meiri ævintýrum á útivelli í þessari keppni, bæði varðandi áhorfendur, dómara og þess háttar. Það er því aðeins öðruvísi fegurð á bakvið keppnirnar.“

Að lokum þarf aðeins að spyrja Óskar út í 35 manna hópinn sem kynntur var fyrir EM í handbolta sem fram fer nú í janúar. Spurður að því hvort hann sé ekki stoltur af því hversu marga leikmenn Valur eigi þar svar Óskar glaður.

„Valur spilaði auðvitað rosalega vel í fyrra og var í Evrópudeildinni. Við erum búnir að spila vel í vetur. Ég held að það hafi verið mjög erfitt að velja þessa 35 leikmenn enda mikið af góðum leikmönnum sem eru ekki á listanum. Ég treysti Snorra og Arnóri til að tækla þetta. Við erum auðvitað stoltir af því að eiga mikið af bæði núverandi og fyrrverandi Valsmönnum í þessum hóp. Á tímabili vorum við ekki með marga landsliðsmenn en núna erum við að komast aftur inn í þetta sem er bara frábært fyrir strákanna.“