Markaskorarinn ögraði með ísraelska fánanum

Biton kom Ísraelsmönnunum yfir á 35. mínútu þegar hann skoraði með skoti fyrir utan vítateig.

Hann hljóp í kjölfarið að varamannabekk Maccabi Tel Aviv þar sem hann fékk flennistóran ísraelskan fána. Hann fagnaði með fánann fyrir framan stúkuna á Kópavogsvelli sem mæltist ekki vel fyrir hjá stuðningsmönnum Breiðabliks.

Biton fékk gult spjald fyrir athæfið en leikmenn Maccabi Tel Aviv voru afar ósáttir við það og umkringdu dómara leiksins, Luka Bilbija.

Mikill hiti er á Kópavogsvelli en stuðningsmenn Ísraels og Palestínu hafa mótmælt fyrir utan hann. Stuðningsmenn Palestínu eru mættir til að mótmæla aðgerðum Ísraels á Gasaströndinni en stuðningsmenn Ísraels eru ósáttir með framferði Hamas-samtakanna.

Staðan í leiknum er 1-1 en Gísli Eyjólfsson jafnaði fyrir Breiðablik á 61. mínútu. Fylgjast má með leiknum í beinni textalýsingu og í beinni útsendingu á Stöð 2 Sport.