Gullnöglin til Kristjáns heitins Eldjárn

Kolbeinn Tumi Daðason skrifar 8. nóvember 2023 16:19

Ólafur Páll Gunnarsson, Ari Eldjárn, Unnur Ólafsdóttir, Stefán Eiríksson, Björn Thoroddsen og Þráinn Árni Baldvinsson.

Gítarleikarinn Kristján Eldjárn sem lést langt fyrir aldur fram fékk í dag Gullnöglina, viðurkenningu Björns Thoroddsen. Þetta kemur fram í tilkynningu.

Nöglin er þakklætisvottur og viðurkenning fyrir þau áhrif sem handhafi Gullnaglarinnar hefur haft á gítartónlist og þá hvatningu sem hann hefur haft að aðra tónlistarmenn og tónlistarunnendur. Unnur Ólafsdóttir, móðir Kristjáns,og Ari Eldjárn, bróðir hans, tóku við nöglinni sem Stefán Eiríksson útvarpsstjóri afhenti í beinni útsendingu á Rás 2.

Kristján var sérlega fjölhæfur gítarleikari. Hann lék jöfnum höndum á klassískan gítar og rafgítar og batt sig aldrei við eina tegund tónlistar. Hann kom fram með fjölda hljómsveita og tónlistarhópa hér heima og erlendis. Hann lék inn á fjölmargar hljómplötur, sá um útsetningar og stjórnaði upptökum. Hann samdi og/eða lék tónlist við ótal leikverk, danssýningar, kvikmyndir, sjónvarpsþætti og auglýsingar.

Kristján stundaði gítarnám frá unga aldri í Tónmenntaskóla Reykjavíkur, Tónlistarskólanum í Reykjavík og Tónskóla Sigursveins og lauk burtfararprófi þaðan í klassískum gítarleik vorið 1996. Hann nam jafnframt rafgítarleik við djassdeild Tónlistarskóla FÍH lauk burtfararprófi þaðan vorið 1995. Á árunum 1997-1998 stundaði hann framhaldsnám í klassískum gítarleik við Tónlistarháskólann í Turku í Finnlandi og lauk einleikara- og kennaraprófi þar hjá hinum þekkta gítarmeistara Timo Korhonen.

„Afhending Gullnaglarinnar er hluti af árlegri gítarhátíð Björns Thoroddsen en stórtónleikar hátíðarinnar fara fram í Bæjarbíói í Hafnarfirði föstudagskvöldið 10. nóvember. Bróðir Kristjáns, grínistinn Ari Eldjárn kemur þar fram og sýnir á sér hlið sem fáir þekkja, en Ari er ansi liðtækur gítarleikari og leikni hans mun koma mörgum á óvart,“ segir í tilkynningu.

Þráinn Árni, gítarleikari Skálmaldar kemur einnig fram á tónleikunum og hljómsveitin Gammarnir þar sem Björn spilar með Þóri Baldurssyni, Stefáni Stefánssyni, Bjarna Sveinbjörnssyni og Sigfúsi Óttarssyni.

Hluti af aðgangseyri stórtónleika gítarhátíðarinnar rennur í minningarsjóð Kristjáns Eldjárns en minningarsjóðurinn verðlaunar árlega efnilega tónlistarmenn og afreksfólk í tónlist með drjúgu fjárframlagi.

Fyrri handhafar Gullnaglarinnar eru: