Leikur sinn tvö hundraðasta leik í efstu deild að­eins 24 ára gömul

Katla Rún er aðeins sjötti leikmaðurinn sem nær því að spila tvö hundruð leiki fyrir Keflavík í efstu deild.

Það sem gerir þessi tímamót sérstök er að Katla Rún hélt upp á 24 ára afmælið sitt í sumar. Hún ætti því að hafa nægan tíma til að bæta mörgum leikjum við.

Katla hefur spilað með meistaraflokki Keflavíkur frá október 2015 en þetta verður hennar níunda tímabil með Keflavík í úrvalsdeild kvenna.

Tímamótunum nær Katla á móti nágrönnunum í Njarðvík en Keflavík heimsækir Ljónagryfjuna í kvöld.

Katla hefur einnig spilað 32 leiki í úrslitakeppni með Keflavík en hún var í síðasta Íslandsmeistaraliði félagsins árið 2017.

Katla er komin inn á topp tíu hjá Keflavík í stoðsendingum (361 - 10. sæti) og þriggja stiga körfum (150 - 7. sæti) og þá er hún á topp tuttugu í stigum (918 - 20. sæti) og stolnum boltum (152 - 18. sæti).

Leikmennirnir fimm sem hafa spilað fleiri leiki fyrir Keflavík í efstu deild eru Anna María Sveinsdóttir, Birna Valgarðsdóttir, Kristín Blöndal, Marín Rós Karlsdóttir og Bryndís Guðmundsdóttir.