Fann tíu hunda sína dauða og grunar ódæði: „Allt sem ég stefndi að í lífinu var tengt hundunum“

„Þetta er gjörsamlega búið að snúa lífinu á hvolf. Allt sem ég stefndi að í lífinu var tengt hundunum. Mér finnst ég ekki vera öruggur heima hjá mér og mun örugglega aldrei finna fyrir öryggi þar aftur nema hægt verði að útiloka að svona lagað geti gerst aftur,“ segir Askur.

Askur býr á bænum Engihlíð í Norðurdal í Breiðdal, upp af Breiðdalsvík á Austfjörðum. Hann er 23 ára gamall og starfar sem hundaþjálfari.

Engir áverkar

Þennan umrædda dag fór Askur í fimm tíma ferð að heiman en hundarnir voru úti í gerði á meðan. Þetta voru sex Síberíu Husky, einn Alaska husky og þrír Border Collie og Síberíu Husky blendingar. Katla, Anett, Alpha, Nome, Lupo, Lunatic, Nagli, Lúsía, Navi og Lágfóta.

Þegar Askur sneri aftur fann hann þau öll dáin.

„Það voru engir sjáanlegir áverkar. Ég þreifaði sjálfur á hundunum og fór svo út um allt gerðið í leit að einhverju sem gæti mögulega hafa orðið þeim að bana en fann ekkert,“ segir Askur.

Gas, rafmagn eða eitur

Askur segir að fyrsti dýralæknirinn sem hann talaði við hafi sagt að þetta gæti ekki hafa gerst vegna eitrunar. Ekkert eitur væri til sem myndi virka á svo skömmum tíma. Sá dýralæknir taldi hitakast líklegustu ástæðuna.

Askur segist hins vegar hafa gengið úr skugga um að í gerðinu væri nóg af vatni og nóg af skugga ef ske kynni að hundunum yrði of heitt.

„Dýralæknar sem ég hef talað við eftir það hafa allir verið ósammála fyrsta dýralækninum og fundist gas, rafmagn eða eitrun líklegasta skýringin,“ segir Askur.

Bíða niðurstöðu krufninga

Að ráðleggingu dýralæknis voru hundarnir ekki frystir heldur kældir. Þurfti Askur að tæma ísskápinn til að koma tveimur þeirra fyrir þar. Eftir helgina var þeim svo komið í flug á Tilraunastöð Háskóla Íslands í meinafræði að Keldum.

Þar eru þeir krufðir en Askur segist enn þá vera að bíða niðurstöðunnar.

„Eina sem mig grunar er hreinlega að einhver hafi komið og drepið þau en á sama tíma vill ég ekki trúa að fólk sé nógu illa innrætt til þess,“ segir Askur. Hundunum hafi þó aldrei verið hótað.

Ómetanlegur stuðningur fjölskyldu og vina

Askur segist ekki vita hvað tekur nú við. Hundarnir hafi verið honum allt, fjölskylda, vinir, vinna og áhugamál.

„Ef kemur í ljós að hundarnir hafi verið drepnir fer ég með þetta beint til lögreglunnar en þangað til er bara einn dagur tekinn í einu,“ segir Askur. Hann segist virkilega þakklátur fyrir stuðning móður sinnar og vina. Einnig er hann þakklátur fyrir að ekki allir hundarnir hans hafi dáið því einhverjir voru með honum í bílferðinni þegar atvikið átti sér stað.

„Þau eru ástæðan fyrir því að ég er enn á lífi í dag og hafa hjálpað mér óendanlega mikið í gegnum þetta,“ segir hann að lokum.

Komið til lögreglu

Að sögn Sigurborgar Daðadóttur, yfirdýralæknis hjá Matvælastofnun, er verið að rannsaka hvort eitrað hafi verið fyrir hundunum. Krufning hafi farið fram og málið sé nú komið til lögreglu.

Sigurborg segir málið ekki eiga sér fordæmi á Íslandi.