„Hann veit manna best að hann þarf að gera eitt­hvað í sínum málum“

Snorri Steinn Guðjónsson var í vikunni ráðinn landsliðsþjálfari Íslands í handknattleik en hann tekur við liðinu sem hafði verið þjálfaralaust í 100 daga eftir að Guðmundi Guðmundssyni var sagt upp störfum. 

Snorri Steinn var gestur í nýjasta þætti handboltahlaðvarpsins Handkastið þar sem hann og Arnar Daði Arnarsson, sérfræðingur Stöð 2 Sport og stjórnandi Handkastsins, fóru yfir víðan völl í umræðu um karlalandsliðið í handbolta.

Meðal þess sem þeir Arnar Daði og Snorri Steinn ræddu var staðan á Aroni Pálmarssyni landsliðsfyrirliða. Aron er á leið heim til FH í sumar og mun leika með liðinu í Olís-deild karla á næsta tímabili. Umræða skapaðist um stöðu Arons í landsliðinu eftir EM í janúar en Aron hefur verið óheppinn með meiðsli á sínum landsliðsferli og lent í því oftar en einu sinni að þurfa að hætta keppni eða forfallast á stórmóti.

„Auðvitað hef ég áhyggjur af því að einn besti leikmaður sem við höfum átt hefur verið mikið meiddur. Það er alveg óháð því hvort hann heitir Aron, Ómar Ingi eða Gísli Þorgeir,“ sagði Snorri Steinn.

„Ætli það verði ekki versti parturinn af þessu, það er að standa af sér desember og vona að enginn meiðist. Það er áhyggjuefni. Það að hann fari í FH, auðvitað væri frábært ef hann væri áfram í sterkustu deildum í heiminum að spila þar á fullu. Hann tekur þessa ákvörðun og hún er ekki bara handboltalegs eðlis og við þurfum að virða það. “

Snorri Steinn segist hafa rætt við Aron og segir að það vanti ekki viljann eða löngunina hjá honum að koma sér á lappir.

„Ég er búinn að ræða við Aron, hann er fáránlega mótiveraður fyrir þessu. Hann veit manna best sjálfur að hann þarf að gera eitthvað, hann þarf að gera eitthvað í sínum málum. Hann er að gera það, það er ekki eins og hann sé bara heima að borða Snickers. Það er bara þvæla.“

„Það vantar ekki viljann og löngunina til að koma sér á lappir.“

 „Væri til í að sleppa við það“

„Varðandi hans hlutverk þá er ég með ákveðnar hugmyndir. Ég er ekkert að fara að umturna hans hlutverki og ég ætla ekkert að tala of mikið um það. Ég ætla bara að setjast niður með honum þegar hann flytur heim í sumar og fara aðeins yfir hvað ég sé fyrir mér frá honum.“

„Aron Pálmarsson í dúndurstandi, það segir sig sjálft að það er lykilleikmaður í þessu landsliði,“ bætti Snorri Steinn við.

Síðasta spurningin sem Snorri Steinn fékk var áhugaverð en þá spurði Arnar Daði hann að því hvort hann myndi banna leikmönnum landsliðsins að tjá sig á samfélagsmiðlum á meðan á stórmótum stendur.

„Ertu að hugsa um Bjögga?,“ spurði Snorri Steinn með gamansömum tón en Björgvin Páll Gústavsson, markvörður Vals og landsliðsins, hefur í gegnum tíðina verið duglegur að tjá sig á samfélagsmiðlum um landsliðsverkefni og ýmis önnur mál.

Skemmst er að minnast málsins sem kom upp á milli Björgvins Páls og Kristjáns Arnar Kristjánssonar, félaga hans í landsliðinu, þar sem Björgvin fór mikinn á samfélagsmiðlum og tilkynnti meðal annars að hann myndi ekki gefa kost á sér í næsta verkefni landsliðsins. Málið leystist þó farsællega.

„Ég talaði nú við Karenu konuna hans um daginn og spurði hvort hún gæti ekki bara tekið internetið úr sambandi um daginn. Við bara sjáum hvaða leið ég fer í því. Ef þú ert að vitna í þetta sem var um daginn þá væri ég til í að sleppa við það,“ sagði Snorri Steinn að lokum.