Esther fékk verð­laun fyrir meistara­verk­efni við Harvard

Verðlaunin eru sögð þau eftirsóttustu innan skólans og eru einu verðlaunin sem veitt eru fyrir góðan námsárangur.

Meistaraverkefni Estherar og Stuti Ginodia, samstarfskonu hennar, er úr opinberri stefnumótun. Verkefnið heitir Unlocking Potential: A Roadmap to Reduce Stunting in Sindh, Pakistan og í því er vaxtarhömlun barna í Sindh héraði Pakistan skoðuð. Þá eru leiðir til að sporna gegn háu hlutfalli vaxtarhömlunar barna í héraðinu lagðar fyrir. Rannsóknin var framkvæmd í samvinnu við Alþjóðabankann.

Esther lauk BA-prófi í mannfræði með stjórnmálafræði sem aukagrein frá Háskóla Íslands. Hún segir það grunnnám þó óhefðbundið fyrir þetta meistaranám. Flestir þar hafi lært hagfræði eða sagnfræði.

Eftir Háskóla segist Esther hafa unnið hjá Unicef á Íslandi í þrjú ár. Síðast sem herferðastýra. Því næst hafi leið hennar og Ísaks Einars Rúnarssonar, unnusta hennar, legið til Massachusetts í nám. Þar höfðu þau bæði komist inn í meistaranám við Harvard Kennedy háskólann. Esther í opinberri stefnumótun og Ísak í opinberri stjórnsýslu.  Parið útskrifaðist í gær.

Aðspurð hvað taki við eftir útskrift þeirra beggja segir Esther að parið stefni á að gifta sig í sumar á Íslandi. Í haust liggi svo leiðin til Washington D.C. þar sem Ísak mun starfa í ráðgjöf. Esther segist ekki búin að ákveða hvað tekur þá við hjá henni en efar ekki að það verði eitthvað spennandi.