Hættir sem formaður ef Samfylkingin kemst ekki í ríkisstjórn

Þetta er á meðal þess sem kemur fram í viðtali við Kristrúnu í sunnudagsblaði Morgunblaðsins.

Frá því að Kristrún tók sæti á Alþingi í september 2021 hefur fylgi Samfylkingarinnar aukist um tæp sextán prósentustig. Hún tók við formennsku í október á síðasta ári. Fylgi flokksins mælist nú 25,7 prósent, tæpum sjö prósentustigum meira en fylgi Sjálfstæðisflokksins. Flokkurinn hlaut 9,9 prósent atkvæða í síðustu þingkosningum.

„Mitt verk­efni, þegar ég tók við flokkn­um, var að gera hann stjórn­tæk­an. Ef mér tekst ekki að gera það þá hef ég brugðist,“ er haft eftir Kristrúnu. 

Hún er jákvæð gagnvart samstarfi með Katrínu Jakobsdóttur og Vinstri grænum. 

„Ég held að við Katrín séum sam­mála um margt. Hún er í stöðu þar sem hún kem­ur ákveðnum hlut­um ekki í gegn. Ég held að hún væri bet­ur sett með mig í fjár­málaráðuneyt­inu en Bjarna,“ segir Kristrún sem hefur, frá því að hún tók við formennsku, ekki útilokað rík­is­stjórn­ar­sam­starf við ákveðna flokka líkt og fyrirrennarar hennar höfðu gert. 

ESB aftur á dagskrá ef þörf krefur

Annað sem virðist hafa fært flokknum aukið fylgi er að setja stuðning við Evrópusambandsaðild Íslands á ís. Varðandi þá ákvörðun segir Kristrún:

„Það þýðir ekk­ert að halda ein­hverju til streitu sem er kannski ekki vilji fyr­ir meðal þjóðar­inn­ar. Ef hlut­irn­ir snú­ast við og það verður knýj­andi þörf og vilji hjá lands­mönn­um til að ganga inn í Evr­ópu­sam­bandið þá mun alls ekki standa á okk­ur. Við get­um ekki keyrt stórt mál eins og þetta í gegn ef það eru ein­ung­is tveir stjórn­mála­flokk­ar á þingi sem hafa áhuga á því.“

Kristrún sneri aftur á Alþingi í dag eftir fæðingarorlof. Hún kvaddi sér hljóðs við upphaf þingfundar og gagnrýndi forystuleysi ríkisstjórnarinnar í þeim málum sem helst brenna á fólkinu í landinu. Nefndi hún í því samhengi verðbólgu, vexti, verkföll og alvarlegan vanda í húsnæðismálum.