Kvikmyndamiðstöð Íslands veitir árlega styrki úr kvikmyndasjóði, meðal annars fyrir leikið sjónvarpsefni. Fjögur verkefni eru á lista, þrjú þeirra; Vigdís, Danska konan og Ráðherrann 2, hafa fengið vilyrði fyrir 200 milljónum króna í heildina í ár.
Magnús Ragnarsson, framkvæmdastjóri miðla hjá Símanum, segir að framleiðslufyrirtæki á þeirra vegum sem sótt hafi um hafi fengið þau svör að það væri ekki meira fjármagn til staðar.

„Það virðist vera að þessi vilyrði sem hafa verið gefin núna úr sjóðinum þetta ár fari öll til framleiðslufyrirtækja sem eru að vinna verkefni fyrir Ríkisútvarpið. Þannig áfram heldur þessi samkeppnisstaða okkar á einkareknu miðlunum að vera frekar sérkennileg, það er að segja að við sitjum alveg óbætt hjá garði þarna líka,“ segir Magnús en hann hefur áður gagnrýnt umsvif RÚV harðlega.
Hingað til hafi það verið eins konar óskráð regla að reyna að ráðstafa fjármagninu betur, þannig að aðrir miðlar komist einnig að, en nú sé ekki gætt jafnræðis. Erfitt sé að standa fyrir öflugri framleiðslu á meðan Ríkisútvarpið yfirtekur sjóðinn en ríkið sé búið að ráðstafa öllum peningnum til síns sjálfs. Ríkisútvarpið hafi þá haft ærið forskot fyrir.
„Þeim gengur miklu betur almennt að fjármagna verkefni í rauninni af því að þeir hafa þetta mikið fjármagn bara í ríkisstuðning í gegnum útvarpsgjöld. Síðan geta þeir notið endurgreiðslna, þeir geta notið Kvikmyndasjóðs, þeir eru í mjög sterku norrænu sölusamstarfi, forskotið er eiginlega út um allt,“ segir Magnús.
Alþingi fjallar nú um nýtt frumvarp um stuðning til einkarekinna miðla og mun Magnús sjálfur mæta fyrir þingnefnd á þriðjudag. Verði ekkert gert er ljóst að áhrifin á einkarekna miðla verði mikil.
„Það er svo sem ósköp einfalt, við munum bara þurfa að draga úr framleiðslu á meðan þeir stórauka framleiðslu, myndin bara skekkist meira og meira,“ segir hann. „Ríkið er að leita lausna, en ríkið er vandinn.“