Sló til lög­reglu sem reyndi að skerast í leikinn

Tilkynnt var um þjófnað þar sem greiðslukorti var meðal annars stolið. Lögregla grunar ákveðinn einstakling en sá reyndi að nota greiðslukortið í verslun. Þetta kemur fram í dagbók lögreglunnar á höfuðborgarsvæðinu þar sem fjallað er um verkefni gærkvöldsins og næturinnar.

Lögreglu barst tilkynning um slagsmál fyrir utan skemmtistað í gær og hafði afskipti af einum sem átti í erfiðleikum með „mannleg samskipti.“ Enginn var handtekinn en einum var vísað burt.

Þá var manni vísað út úr verslun að beiðni starfsmanns verslunarinnar en sá taldi sig ekki þurfa að gefa upp nafn og kennitölu þegar lögregla mætti á vettvang. Hann var því færður inn í lögreglubifreið en virtist hafa áttað sig og gaf þá undan, að því er fram kemur í dagbókinni. Lögreglustöð 1, sem sér um Austurbæ, Vesturbæ, Miðborg og Seltjarnarnes, sá um útkallið.

Eins og oftlega um helgar voru nokkrir ökumenn stöðvaðir undir áhrifum áfengis eða fíkniefna. Lögreglumenn á Stöð 4, sem sjá um Grafarvog, Mosfellsbæ og Árbæ, stöðvuðu för ökumanns sem reyndist hafa neytt áfengis, en mældist rétt undir kærumörkum. Lögregla skutlaði honum síðasta spölinn.

Þá var tilkynnt um tvær líkamsárásir á stöð 3, Kópavogur og Breiðholt, og er önnur þeirra flokkuð sem heimilisofbeldi.