Vest­læg átt og sums staðar stormur

Á vef Veðurstofunnar segir að lengst af verði þurrt fyrir austan. Dregur smám saman úr vindi og í kvöld orðið nokkuð skaplegt víðast hvar. Vægt frost en yfirleitt frostlaust við ströndina.

Gular viðvaranir eru í gildi vegna hvassviðris eða storms fram á miðjan dag en fram á kvöld norðaustantil.

„Á morgun er síðan von á enn einni lægðinni sem keyrir yfir landið. Í byrjun má gera ráð fyrir slyddu eða snjókomu sem síðan færist yfir í rigningu og ágætum hita. Um kvöldið verður vindur suðvestlægur með skúrum eða slydduéljum og kólnar aftur,“ segir á vef Veðurstofunnar.

Veðurhorfur á landinu næstu daga

Á laugardag: Suðlæg átt 8-15 m/s og slydda eða snjókoma, en fer að rigna sunnan- og vestanlands með morgninum. Hlýnandi, hiti 1 til 7 stig eftir hádegi. Suðvestlægari síðdegis með skúrum um landið sunnan- og vestanvert.

Á sunnudag: Norðlæg eða breytileg átt 5-13 og él, en úrkomulítið sunnanlands eftir hádegi. Frost 0 til 6 stig.

Á mánudag: Fremur hæg breytileg átt og þurrt að kalla, en hvassari austanátt síðdegis með snjókomu á köflum sunnantil. Frost 0 til 10 stig, kaldast í innsveitum fyrir norðan.

Á þriðjudag: Norðaustlæg átt og él, en lengst af úrkomulítið suðvestantil. Frost 2 til 12 stig, mildast syðst.

Á miðvikudag: Breytileg átt og él á víð og dreif. Heldur kólnandi.

Á fimmtudag: Útlit fyrir vaxandi suðlæga átt með vætu og hlýnandi veðri í bili.